Qaraǵandyda bankterdiń karantın talaptaryn saqtaý tártipteri tekserildi
QARAǴANDY. QazAqparat – Qaraǵandydaǵy ekinshi deńgeıli bankterdiń sanıtarlyq normalardy saqtaýy tekserildi, dep habarlaıdy QazAqparat tilshisi.
Búgin Qaraǵandy oblysynyń taýarlar men qyzmetterdiń sapasy men qaýipsizdigin baqylaý departamentiniń qyzmetkerleri jergilikti atqarýshy organ ókilderimen jáne ýchaskelik ınspektormen birlesip Qaraǵandy qalasynyń Oktıabr aýdanyndaǵy bankterge reıdtik tekseris ótkizdi. Ol úshin arnaıy mobıldi top quryldy. Atalmysh toptyń ókilderi Qaraǵandy qalasynyń Maıqudyq shaǵyn aýdanynda ekinshi deńgeıli bankterdiń bes fılıalyn tekserdi.
Tekserýshiler bank kireberisinde sanıtaızerler men dezınfektsııalyq quraldardyń bolýyna nazar aýdardy. Sondaı-aq mekemelerde klıentterdiń temperatýrasyn tekserý úshin termometrler bolýy tıis. Ereje boıynsha, eger klıenttiń temperatýrasy 36 gradýstan aspaıtyn bolsa, bankke kirýge ruqsat etiledi.
Reıd barysynda mobıldi top ókilderi bank ákimshiliginen óz qyzmetkerleriniń temperatýrasyn tekserip, jazatyn tirkeý kitabyn usynýdy surady. Tirkeý kitabynda kúnine eki ret qyzmetkerlerdiń temperatýrasy týraly derekter tirkelýi tıis.
Bank qyzmetkerleriniń maskalary men qolǵaptarynyń bolýyna da úlken kóńil bólindi.
«Biz mindetti túrde óz qyzmetkerlerimizdi maskalarmen jáne qolǵaptarmen qamtamasyz etemiz. Jáne olardy kúnine birneshe ret aýystyryp otyramyz. Sondaı-aq biz kúnine birneshe ret bólmeni jeldetemiz. Keıde bizde betperdesi joq, biraq jedel qarjylyq operatsııalardy júzege asyrýdy ótinip keletin klıentter bolady. Mundaı jaǵdaılarda biz olarǵa bir rettik maska usynamyz. Biraq karantın kezinde osy sekildi jaıt tek 3-4 ret boldy», - deıdi «Qazaqstan Halyq banki» AQ Qaraǵandy fılıalynyń №4 derbes ortalyǵynyń bastyǵy Ásel Igembaeva.
Reıd kezinde sanıtarlyq qyzmet mamandary Sberbank fılıalynyń ákimshiligine eskertý jasady. Bank bólimshesinde mobıldi top ókilderi kútý aımaǵynda bank klıentteri arasynda áleýmettik qashyqtyqty saqtamaǵanyn anyqtady.
«Búgingi tańda biz bes bank fılıalyna bardyq. Buzýshylyqtar anyqtalǵan joq, barlyq qyzmetkerler karantındik rejım boıynsha belgilengen talaptardy saqtaıdy. Jalǵyz ǵana eskertý klıentteri belgilengen áleýmettik qashyqtyqty saqtamaǵan «Sberbank« ákimshiligine jasaldy. Ekinshi deńgeıli bankter úshin mundaı tekserý búgin birinshi ret ótkizildi. Sońǵy ýaqytta sapany baqylaý ókilderi kún saıyn shaǵyn jáne orta bıznestiń sanıtarlyq erejelerdi saqtaýyna tekserý júrgizedi», - dedi Qaraǵandy qalasy Oktıabr aýdanynyń TQSQBB bas mamany Ásel Turmaǵanbetova.
