Qaraǵandyda balalarǵa robottehnıkasyn úıretetin tehnopark ashylady
QARAǴANDY. QazAqparat - Qaraǵandyda Balalar men jasóspirimder saraıynda tehnopark ashý josparlanýda. Onda robototehnıka, astronomııa, qurastyrý jáne ınjenerlik negizder boıynsha sabaqter ótedi, dep habarlaıdy QazAqparat oblys ákimdiginiń saıtyna silteme jasap.
Tehnoparkti qurý jáne jabdyqtaý úshin qalalyq bıýdjetten 14 mıllıon teńge qarajat bólindi.
Qazir mamandar bolashaq tehnoparktiń jobasyn ázirleýde. Qyrkúıekte oǵan qajetti jóndeý jumystaryn júrgizý úshin jáne qural-jabdyqtar alýǵa baıqaý jarııalanady. Al barlyq jumystar qarashada aıaqtalyp, ashylady dep kózdelgen.
Jańa tehnoparkte jumys eki negizgi modýl boıynsha júredi: ǵylymı-zertteý jáne fýnktsıonaldy.
Birinshi boıynsha ártúrli semınarlar men konferentsııalarǵa qatysý, jas zertteýshilerdiń kishi akademııasy janynan qyzmet etý, qyzyqty astronomııa jáne kosmonavtıka boıynsha bilim baǵdarlamasyn júzege asyrý josparlanǵan. Ol úshin BJS-da mobıldi planetarıı men jabdyqtalǵan astronomııalyq keshen ornatylmaq.
Fýnktsıonaldy modýl aıasynda birneshe zerthanada sabaqtar ótkiziledi, onyń ishinde robottehnıka zerthanalarynda bolady. Sonymen qatar bul jerde oqýshylar ártúrli materıaldardy qaıta óńdeý tehnologııalarymen tanysý úshin jáne 3D modelge deıingi qaıta óńdeý nobaıyn anyqtaýdan bastap daıyn ónim qurý úshin stanoktar ornatylady .
«Bul sabaqtarǵa qabyldaý ádettegideı, bizdiń saraıda júrgiziledi. Úıirmelerge 5 jastan bastap joǵary synyp balalaryn shaqyratyn bolamyz. Sabaqtardyń baǵasy biz jabdyqtardy qanshaǵa alatynymyzǵa baılanysty bolatyn shyǵar. Eger sabaqtar jartylaı aqyly bolǵannyń ózinde quny qoljetimdi bolady. Biz basynda oqýshylar men ýorkshop formaty jáne sheberlik sabaqtary- qysqa merzimdi baǵdarlamalaryna basymdyq beremiz dep oılap otyrmyz. Óıtkeni, birinshiden, qarashada ortalyq ashylǵanda alǵashqy turaqty top qurý qıyndaý bolady. Ekinshiden, mundaı format bizge aldaǵy ýaqytta uzaq merzimdi baǵdarlamalarǵa toptar jınaý úshin oqýshylardyń qyzyǵýshylyǵyn anyqtaýǵa kómektesedi», - deıdi Balalar men jasóspirimder saraıynyń ǵylymı-ádistemelik jumystar boıynsha dırektorynyń orynbasary Marına Isaınova.
Tehnopark ornalasatyn aýmaq jabdyqtardy ornatýǵa daıyn. Jańa úıirmeler men tehnıkalarǵa oryn jetý úshin BJS ákimshiligi kórkemdik-estetıkalyq baǵyttar boıynsha jáne mektepke deıingi damytý toptaryna qabyldaýdy azaıtýǵa týra kelgen. Alaıda bul toptardy jabýdy josparlap otyrǵan joq, óıtkeni olar BJS kelýshiler arasynda suranysqa ıe.
