Qaraǵandyda balalar reanımatologyn kólik qaǵyp ketti
QARAǴANDY. QazAqparat – Qaraǵandyda jas júrgizýshi jumysyna ketip bara jatqan dárigerdi qaǵyp ketti, dep habarlaıdy QazAqparat tilshisi.
Operatsııaǵa asyǵyp bara jatqan balalar reanımatologynyń jaǵdaıy aýyr dep baǵalanýda.
15 tamyzda «Mazda» kóliginiń 18 jastaǵy júrgizýshisi Erjanov kóshesimen Gazalıev kóshesine qaraı kele jatqanda, rettelmeıtin jaıaý júrginshiler jolaǵynda 55 jastaǵy qala turǵynyn qaǵyp ketti.
Jol-kólik oqıǵasy saldarynan túrli dene jaraqatyn alǵan zardap shegýshi medıtsınalyq mekemege jetkizildi. Belgili bolǵandaı, ol ota jasaýǵa asyǵyp bara jatqan reanımatolog dáriger bolyp shyqty.
«Qazir ol Maqajanov atyndaǵy travmatologııa ortalyǵynyń jansaqtaý bóliminde jatyr. Tótenshe jaǵdaı operatsııaǵa shaqyrǵan aýrýhananyń mańynda bolǵan. Er adamnyń qoly men aıaǵy synyp, basy jaraqattanǵan. Jaǵdaıy aýyr dep baǵalanyp otyr», - dep habarlady Qaraǵandy oblystyq Densaýlyq saqtaý basqarmasynyń baspasóz qyzmeti.
Atalǵan fakti boıynsha, QR QK 345-baby 2-bóligi boıynsha sotqa deıingi tergeý jumystary bastalyp, qajetti saraptamalar taǵaıyndaldy.
