Qaraǵandyda balalar men jasóspirimder saraıynyń qurylysy bastaldy
QARAǴANDY. QazAqparat - Qaraǵandyda jańa balalar men jetkinshekter saraıynyń qurylysy bastaldy. Kishkentaı qaraǵandylyqtarǵa osyndaı syılyq jasaý týraly tapsyrmany Elbasy - Tuńǵysh Prezıdent Nursultan Ábishuly Nazarbaev ótken jazda Qaraǵandyǵa kelgen kezde bergen bolatyn, dep xabarlaıdy QazAqparat tilshisi.
Búgin bolashaq ǵımarattyń ornynda ýaqyt kapsýlasyn salý rásimi ótti. Onda qazirgi jastardan bolashaq urpaqqa Joldaý salynǵan. Kapsýlany 2050 jyly ǵana ashady.
«Balalardy qorǵaý kúni olarǵa syılyq tartý dástúrge aınalǵan. Elbasynyń tapsyrmasy boıynsha biz qaraǵandylyq balalarǵa keń, qazirgi zamanǵy Oqýshylar saraıyn syılaımyz. Burynǵy saraı osydan 80 jyl buryn salynǵan bolatyn. Ókinishke oraı, ol barlyq talaptarǵa jaýap bermeıdi jáne oǵan barlyq nıet bildirýshiler syımaıdy», - dedi Erlan Qoshanov.
Kapsýlany salý rásimine qatysýshylar qaraǵandylyq oqýshylardyń qolóner buıymdary men ónertabystarynyń kórmesin kóre aldy. Kórmede avıamodeldeý úıirmesiniń qatysýshylary jasaǵan ushaqtar kórsetildi.
Balalar men jasóspirimder saraıynyń jańa ǵımaraty Ońtústik-Shyǵysta, Dostyq úıiniń artynda salynady. Bul zamanaýı úsh qabatty ǵımarattyń kólemi shamamen 10 myń sharshy metrdi quraıdy. Ǵımarattyń syrty energııa únemdeıtin materıaldarmen qaptalady.
«Munda barlyq sabaqtar tegin bolady. Oǵan 4000-nan astam bala qatysa alady. Robototehnıka, baǵdarlamalaý jáne avıamodeldeý sııaqty 50-den astam tehnıkalyq baǵyttaǵy úıirmelerdi uıymdastyrý josparlanýda. Sonymen qatar, biz balalarǵa zamanaýı tehnologııalardy - gıdroponıka men aeroponıkany paıdalanýdy úıretetin bolamyz. Bul - ózekti jáne qazirgi balalarǵa óte qyzyqty dárister. Gýmanıtarlyq jáne shyǵarmashylyq baǵytty qalaıtyndar úshin munda úıirmeler, sheberhanalar, horeografııalyq zaldar, kovorkıngter jumys isteıdi», - deıdi qalalyq bilim bóliminiń basshysy Gúlsim Qojahmetova.
Jańa Oqýshylar saraıynyń qurylysy 2020 jyldyń qarasha aıynda aıaqtalýy tıis.
