Qaraǵandyda bala ólimine sebepshi bolǵan batýttyń ıeleri sottaldy
QARAǴANDY. QazAqparat – Qaraǵandyda ortalyq saıabaqta qatty jelden aýdarylyp, bala ólimine ákep soqqan batýttyń ıelerine sot úkimi shyqty, dep habarlaıdy QazAqparat tilshisi.
24 jeltoqsanda Qaraǵandy qalasynyń Qazybek bı aýdandyq sotynda aýdarylǵan batýt isi boıynsha aıyptalýshyǵa úkim shyqty. Sýdıa Arǵyn Qutyshev Qaraǵandy qalasynyń ortalyq saıabaǵynda tóńkerilgen batýttyń ıeleri, erli-zaıypty Tákishevterge úkim shyǵardy.
Ótken juma kúni, 20 jeltoqsanda sot jaryssózi ótip, prokýror Erlan Tákishevke - 5 jyl merzimge bas bostandyǵynan aıyrý, Álııa Tákishevany - 4 jylǵa bas bostandyǵynan aıyrý jazasyn suraǵan bolatyn. Memlekettik aıyptaýshy bul rette erli-zaıyptylar qazir úsh bala tárbıelep otyrǵanyn jeńildetetin jaǵdaı retinde eskerdi. Sondaı-aq, prokýror sottan aıyptalýshylardan 2 mıllıon teńge óndirip alýdy surady. Sonymen qatar Erlan Tákishevti «maıor» ataǵynan aıyryp, erli-zaıyptylarǵa bes jyl boıy kásipkerlik qyzmetpen aınalysýǵa tyıym salýdy ótingen.
Búgingi sot úkimine sáıkes Erlan Tákishevke 5 jyl merzimge bas bostandyǵynan aıyrý jazasy taǵaıyndaldy, al onyń jubaıy Álııa Tákisheva 4 jyl merzimge bas bostandyǵynan aıyryldy. Alaıda ony kishi balasy áli 14 jasqa tolmaǵandyqtan, ol óz jazasyn tek 5 jyldan keıin óteıdi.
Sonymen qatar, aıyptalýshylar zardap shekken tarapqa moraldyq zalal tóleýi tıis.
Esterińizge sala keteıik, 25 mamyrda qalanyń ortalyq saıabaǵynda qatty jelden batýt aýdarylyp qalǵan bolatyn. Oqıǵa saldarynan 12 jasar Borıs Rýdakov qaza taýyp,taǵy úsh bala aýyr jaraqat aldy.
