Qaraǵandyda baqtashylar polıtsııaǵa joǵalǵan malyn urlandy dep shaǵym túsirgen
QARAǴANDY. QazAqparat - Qaraǵandy oblysynda polıtseıler jaıylymda joǵalyp ketken maldardy ıelerine qaıtardy, dep habarlaıdy QazAqparat tilshisi.
Oblystyq ІІD ókilderiniń aıtýynsha, ústimizdegi jyldyń 20 tamyzynda Abaı aýdanyndaǵy Sarepti aýylynyń turǵyny polıtsııaǵa qystaýdan shyqqan soń 63 qoıynyń joǵalǵanyn aıtyp ótinish túsirgen. Ol maly joǵalǵanyn bilgen tusta óz betimen izdeı bergen. Alaıda tabyla qoımaǵan soń, polıtsııaǵa júgingen.
Jedel-izdestirý sharalarynyń nátıjesinde 63 qoıdyń 23-i Qoıandy bólimshesiniń mańynan tabylyp, ıesine qaıtaryldy. Qazirgi kezde qalǵan 40 qoıdy izdeý jumystary jalǵasyp jatyr.
Budan tys, 13 tamyz kúni Osakarov ishki ister bólimine sharýa qojalyǵynyń ıesi kelip, belgisiz bireýler jaıylymdaǵy 23 qoıyn urlap ketkenin aıtyp shaǵymdanǵan. Іzdestirý sharalary kezinde qoılar Batpaq aýylynyń mańynan tabyldy. Anyqtalýynsha, qoıdy eshkim urlamaǵan, tek qaraýsyz qalǵan mal óz betimen jaıylyp júrip, basqa jaqqa aýyp ketken bolyp shyqty.
Vedomstvo ókilderiniń aıtýynsha, 15-23 tamyz aralyǵynda oblystyń ishki ister organdaryna taǵy 4 azamat mal urlandy degen ótinishpen kelgen. Osy joǵalǵan maldyń barlyǵy polıtsııanyń kúsh salýymen tabylyp, ıelerine qaıtarylǵan. Biraq olardyń eshqaısysynda urlyq deregi anyqtalmaǵan.
«Mal kóbinese ıeleriniń beıqamdyǵynan joǵalady. Al olar polıtsııaǵa kelip malymdy urlap ketti dep aryzdanady. Mundaı jaǵdaılar polıtsııanyń kúshi men qarajattarynyń jıi jumsalýyna ákep soqtyrady», deıdi oblystyq ІІD ókilderi.
