Qaraǵandyda azyq-túlik taǵamdaryn aýystyrǵan ıaslı-balabaqsha dırektory jazalandy
ASTANA. QazAqparat - Qaraǵandydaǵy «Tańsholpan» ıaslı-balabaqshasynyń dırektory azyq-túlik taǵamdaryn aýystyrǵany jáne ratsıonyn buzǵany úshin ákimshilik jaýapkershilikke tartyldy, dep habarlady QR Ulttyq ekonomıka mınıstrliginiń baspasóz qyzmeti.
Ata-analardyń ujymdyq shaǵymyna oraı Qaraǵandy oblysynyń tutynýshylar quqyǵyn qorǵaý departamentiniń mamandary júrgizgen tekseris 20214 jylǵy qarasha-jeltoqsan aılarynda balalar baqshasynda sarymaıdyń ornyna «Eýrazıan Fýds» óndirisiniń ósimdik maıy qospasy qoldanylǵanyn anyqtady. Sondaı-aq «Le Crima» qurǵaq súti, kondıter ónimderiniń ornyna - keptirilgen nan, jas jemisterdiń ornyna shyryn paıdalanylǵan.
Sonymen qatar, on eki ataýdaǵy azyq-túlikter boıynsha (et, balyq, sút, súzbe, qaımaq, irimshik, ósimdik maıy, kókónis, qant, kepilgen jemister, kakao) balalar taǵamynyń táýliktik normalary buzylǵan.
Ata-analardyń taǵy bir shaǵymy qýattalmady: ónimderdiń sapasy men qaýipsizdigin dáleldeıtin qujattar usynyldy. «Tańsholpan» ıaslı-baqshasynda balalardyń bolýy men tamaqtanýyna baılanysty tamaqtan ýlaný jaǵdaıy tirkelgen joq.
Qaraǵandy qalasyndaǵy «Tańsholpan» ıaslı-balabaqshasyna baratyn balalardyń on alty ata-anasynan Qaraǵandy qalasynyń Qazybek bı aýdany boıynsha tutynýshylardyń quqyǵyn qorǵaý basqarmasyna 19 qańtarda ujymdyq shaǵym túsken bolatyn. Ata-analar tamaqtaný buzylýyna jáne azyq-túlik ónimderiniń qaýipsizdigi sapasyna qujattar bolmaýy týraly shaǵymdanǵan.
