Qaraǵandyda Azıada alaýyna arnalǵan án jazyldy
QARAǴANDY. 25 qańtar. QazAqparat /Valentına Elızarova/ - Qaraǵandyda Azıada alaýyna arnalǵan án jazyldy. Onyń avtory - Saran qalasynyń prokýrory Berik Ahmetjanov pen kásibı oryndaýshy jáne kompozıtor Marat Bekishev. Bul týraly Alaý estafetasyn ótkizý shtabynan habarlady.
«Bul qaraǵandylyqtardyń Azıadaǵa arnaǵan tartýy. Basqa óńirlerdiń ishinde tek Aqtaýda ǵana Azıadaǵa án arnalǵanyn biz bilemiz. Azıada ánuranynan basqa, bul baıraqty básekege arnalǵan basqa án joq», - dedi respýblıkalyq shtabtyń ókili, oblystyq sport basqarmasynyń mindetin atqarýshy Tastanbek Esentaev.
«Azıada alaýy» áni 28 qańtar kúni, Qaraǵandy oblysy Alaý estafetasyn qabyldaǵan kúni bolatyn kontsertte oryndalady.
Án sóziniń teń avtory, paýerlıftıngten halyqaralyq sport sheberi, ardagerler arasynda Azııa chempıony, prokýror B.Ahmetjanov Alaý estafetasyna qatysady.
Jetinshi qysqy Azııalyq oıyndar 30 qańtar men 6 aqpan aralyǵynda Astana men Almatyda ótedi.
