Qaraǵandyda ajyrasqan otbasylarǵa quqyqtyq kómek kórsetiledi
ASTANA. QazAqparat - Shahtınsk prokýratýrasy sot oryndaýshylar jáne medıatorlarmen birlese «Aınalaıyn» alıment ortalyǵyn ashpaq, dep habarlaıdy Qaraǵandy oblysy ákiminiń resmı saıty.
Ortalyq qyzmetkerleri ajyrasyp ketken otbasylarǵa ózara kelisimge kelýge jáne barlyǵy úshin tıimdi sheshim tabýǵa kómektesetin bolady.
Medıatsııa degenimiz - burynǵy erli-zaıyptylar arasyndaǵy daýlardy tıimdi sheshý ádisiniń bir túri. Alıment ortalyǵy boryshkerlerden alımentterdi ótep alý boıynsha quqyqtyq kómekterdi kórsetetin bolady.
Ortalyqta istiń qalaı atqarylyp jatqandyǵyn baqylaıtyn prokýratýra ókilderi, memlekettik, jeke menshik sot oryndaýshylary men medıatorlar jumys isteıtin bolady.
Ortalyqta azamattardy qabyldaý ár beısenbi saıyn saǵat 10:00 men 12:00 aralyǵynda, Shahtınsk qalasy, Abaı Qunanbaev dańǵyly 65B mekenjaıy boıynsha (HQKO ǵımaraty, 2 qabat) №201 kabınette júrgiziledi. Baılanys telefondary 5-18-30, 5-59-22.
Aıta keteıik, Qaraǵandynyń Oktıabr aýdanynda Oktıabr aýdanynyń aımaqtyq sot oryndaýshylary bóliminiń ǵımaratynda dál osyndaı «Bolashaq» alıment ortalyǵy jumys jasaıdy. Ortalyq jumysyna memlekettik jáne jeke menshik sot oryndaýshylary, ishki ister, halyqty jumyspen qamtý mekemeleriniń qyzmetkerleri men medıatorlar tartylǵan. Ondada azamattardy qabyldaý ár beısenbi saıyn júrgiziledi.
