Qaraǵandyda aınalma jol salynady
QARAǴANDY. QazAqparat - Kólik aǵynyn retteý maqsatynda Qaraǵandyda aınalma jol salynady, dep habarlady «QazAqparat» HAA tilshisi.
Oblys ortalyǵy arqyly táýligine shamamen 22 myń avtokólik ótedi. Bul kólik keptelisin týǵyzyp, jolǵa artyq salmaq túsiredi. Qaraǵandy oblysynyń ákimdiginde ótken apparat otyrysynda Soltústik jáne Shyǵys aınalma joldarynyń qurylysy boıynsha jobalyq-smetalyq qujattar daıyn ekeni aıtyldy. Qujat memlekettik saraptamadan ótken.
49 kılometrlik tasjoldy salýǵa jumsalatyn 46 mıllıard teńge qarjy respýblıkalyq bıýdjetten bólinedi.
Oblys ákimdiginiń baspasóz qyzmetiniń habarlaýynsha, Qaraǵandynyń soltústik aınalma joly «Ortalyq-Ońtústik» kólik dálizin rekonstrýktsııalaý aıasynda júrgizilip, Sortırovka arqyly ótetin bolady. Al Qarqaraly jolaıryǵynan bastalatyn Shyǵys aınalma joly «Saryarqa» arnaıy ekonomıkalyq aımaǵy, Úshtóbe arqyly ótip, Almaty tasjolyna jalǵasady, deıdi oblys ákimdiginiń baspasóz qyzmetindegiler.
«Áleýetti merdiger uıymdardyń ótinishterin aldyq. Búkil ýchaskeni tórt bólikke bólip, onyń árqaısysyn jeke kompanııalar quratyny belgili boldy. Konkýrsqa 14 fırma qatysqan. Konkýrs 20 qyrkúıekte qorytyndylanyp, jeńimpazdar jarııalanady», deıdi ákimdiktiń baspasóz qyzmetindegiler.
Jańa avtojoldyń qurylysy 2017 jyldyń qarashasynda bastalyp, 2019 jyly tolyǵymen aıaqtalady.
