Qaraǵandyda «Aıbyn-2021» respýblıkalyq áskerı-patrıottyq jastar jıyny bastaldy

QARAǴANDY. QazAqparat – Qaraǵandydaǵy Dostyq úıinde VII «Aıbyn-2021» respýblıkalyq áskerı-patrıottyq jastar jıynynyń ashylý rásimi ótti, dep habarlaıdy QazAqparat tilshisi.

Jıyn aibynonline.kz saıtynda onlaın formatta ótedi. Ol 30 qarashaǵa deıin jalǵasady. Bıyl «Aıbyn» Qazaqstan Respýblıkasy Táýelsizdiginiń 30 jyldyǵyna arnalǵan. Qatysýshylar sany eki esege artyp, 1110 adam jınaldy, elimizdiń túkpir-túkpirinen 74 komanda qatysyp jatyr.

Qaraǵandy oblysynan úsh komanda qatysady: «Búrkit» (Qaraǵandy joǵary polıtehnıkalyq kolledji), «Qaisar» (Qaraǵandy mashına jasaý kolledji), «Jas Sarbaz» (Balqash q. №8 JBBM).

Komandalardan basqa, kez-kelgen jasóspirim jeke jıynǵa qatysa alady.

Jıyn baǵdarlamasynda «Aıbyn daryny», «Aıbyn juldyzy», «Meıirimdilik biriktiredi», «Smart Sarbaz-2021» zııatkerlik jáne shyǵarmashylyq baıqaýlar, sondaı-aq áskerı-qoldanbaly sport túrleri jáne alǵashqy medıtsınalyq kómek kórsetý boıynsha jarystar bar. Bıyl jas jýrnalısterge arnalǵan «Jas sarbaz - Jas tilshi» atty jańa baıqaý qosyldy. Sonymen qatar, komandalar toǵyzqumalaq ulttyq oıynynda baq synaıtyn bolady.

Barlyq baıqaýlardyń qorytyndysy boıynsha kóshbasshylar anyqtalady. Olar «Bilim. Abyroı. Jeńis» aqtyq oınynda baq synasady.