Qaraǵandyda aıaldamada turǵan qyzdy kólik qaǵyp ketti
QARAǴANDY. QazAqparat - Qaraǵandyda Audi markaly kóliktiń 43 jastaǵy júrgizýshisi avtobýs aıaldamasyn soǵyp, aǵashqa tirelgen, dep habarlaıdy QazAqparat tilshisi.
«28 maýsym kúni tańerteń Audi avtokóliginiń 43 jastaǵy júrgizýshisi Qaraǵandy qalasy Volgodonskaıa kóshesiniń boıyndaǵy aıaldamany soqty. Oqıǵa saldarynan sol ýaqytta aıaldamada turǵan 23 jastaǵy boıjetken zardap shekti. Oǵan dereý medıtsınalyq kómek kórsetildi, degenmen aýrýhanaǵa jatqyzylǵan joq», - deıdi oblystyq Іshki ister departamenti baspasóz qyzmetiniń ókili.
Aldyn ala berilgen málimet boıynsha, júrgizýshi kóligine ıe bola almaı qalǵan.
Audi júrgizýshisine qatysty QR ÁQBK-niń 6-baby, 2-bóligi (Júrgizýshilerdiń jol qozǵalysy erejelerin buzý saldarynan adamdardyń densaýlyǵyna zııan keltirý, kólik quraldaryn jáne ózge de dúnıeni buzý) boıynsha ákimshilik hattama toltyryldy.
