Qaraǵandyda aıaldama pavılondary men sport alańdary dezınfektsııalanyp jatyr

QARAǴANDY. QazAqparat - Qaraǵandyda aıaldama pavılondary dezınfektsııalanady. Jumysshylar sondaı-aq otyratyn oryndardy tazalaıdy jáne irgeles aýmaqty zararsyzdandyrady, dep habarlaıdy QazAqparat tilshisi.

«Búginnen bastap joldardy, saıabaqtardy jáne gúlzarlardy kútip ustaý boıynsha qyzmet kórsetetin barlyq merdigerlik uıymdar aıaldamalardy, oryndyqtardy, tirek qorshaýlaryn, ýrnalardy, baǵdarsham nysandaryn, baǵdarshamdardy shaqyrý tablosyn arnaıy qospamen óńdeýdi bastady. Sondaı-aq kúnine bir ret balalar men sport alańdaryna dezınfektsııa júrgiziledi», - deıdi Qaraǵandy qalasynyń kommýnaldyq sharýashylyq bólimi basshysynyń orynbasary Rústem Qojaqpanov.

Jumysty tórt merdiger uıym oryndaıdy. Aýdandyq ákimdikter men kommýnaldyq sharýashylyq bólimi tarapynan kúndelikti baqylaý júrgiziledi.

Qalada kún saıyn 400-den astam aıaldama pavılony, 2000 oryndyq, jaıaý júrginshiler shaqyrý qurylǵylarynda 92 shaqyrý tablosy óńdeledi.

«Qaraǵandy Sý» JShS aýyz sý sapasyn baqylaý zerthanasy bastyǵynyń mindetin atqarýshy Elena Gnılomedova dezınfektsııany qandaı eritindimen júrgizetinin aıtty.

«Kún saıyn «Qaraǵandy Sý» JShS zerthanasy 400 tekshe metr kóleminde kontsentratsııasy 0,1% kaltsıı gıpohlorıdi negizinde hlorly dezınfektant daıyndaıdy. Bul dezınfektant zararsyzdandyratyn qasıetterge ıe», - dep túsindirdi maman.