Qaraǵandyda avtobýstar tozǵan, júrgizýshiler tapshy - qala ákimi

QARAǴANDY. QazAqparat – Qaraǵandy avtoparkteri jolaýshylar tasymalynyń sapasyn jaqsartý úshin bıyl 100 jańa avtobýs satyp alýdy josparlap otyr. Sondaı-aq, júrgizýshilerdiń jetispeýshiligin sheshý maqsatynda D sanatynda oqytý ortalyǵy ashylmaq. Bul týraly óńirlik kommýnıkatsııalar qyzmeti alańynda ótken brıfıngide Qaraǵandy qalasynyń ákimi Ermaǵanbet Bólekpaev málimdedi, dep habarlaıdy QazAqparat tilshisi.

«Pandemııa jolaýshylar tasymalyna qatty áser etti. Birinshi kezekte bizde júrgizýshilerdiń jetispeýshiligi problemasy bar. Bizde ótkir tapshylyq – D sanatyndaǵy 200-ge jýyq júrgizýshi jetispeıdi, ekinshi másele – jyljymaly quram. Biz onyń qatty tozǵanyn túsinemiz. Ótken jyly avtoparkter 40-tan astam avtobýs satyp alsa, bıyl taǵy 100-in alady. Qazirdiń ózinde kelisimsharttar jasaldy. Jetkizý qazan aıynda bolady. Birinshi kezekte sýbsıdııalardy arttyramyz. 80 teńge tarıfi sońǵy 6 jylda ózgergen joq. Sondyqtan, osy jyly sýbsıdııalar 8 mlrd-qa deıin ulǵaıtylady, onyń 3 mlrd-y qazirdiń ózinde tólendi. Jańa avtobýstar satyp alynǵan soń, biz pandemııa kezinde jabylǵan baǵyttardy ashamyz», - dedi qala ákimi.

Sondaı-aq, Qaraǵandyda júrgizýshilerdiń jetispeýshiligin sheshý úshin D sanatynda oqytý ortalyǵyn ashý josparlanǵan. Búgingi tańda mundaı ortalyq tek Nur-Sultan qalasynda bar.

«Júrgizýshilerge qatysty. Avtobýsty tek D sanatyndaǵy júrgizýshi kýáligimen basqara alady, al ony Nur-Sultanda ǵana alýǵa bolady. Sondaı-aq, belgili bir jumys tájirıbesi bolýy kerek. Ondaı mamandardy tabý óte qıyn. Sondyqtan, bul máseleni sheshý úshin bıyl biz bıýdjet qarajatyn salyp, avtobýs júrgizýshilerin oqytatyn polıgon salý úshin konkýrs ótkizemiz. Sonan soń jergilikti mamandar osy jerden kýálik ala alady. Polıgon eski áýejaı aýmaǵynda bolady. Bul jumys HQKO-men birlesip júrgiziledi», - deıdi Ermaǵanbet Bólekpaev.