Qaraǵandyda avtobýs jolda turǵan «KamAZ» tirkemesine soǵyldy
QARAǴANDY. QazAqparat - Qaraǵandyda baǵdarlyq avtobýs jol shetinde turǵan júk kóliginiń tirkemesine kelip soǵyldy. Apattan 3 adam zardap shekti, dep habarlaıdy QazAqparat tilshisi.
7 qarashada saǵat 16:00-der shamasynda «Shaolın» marshrýttyq avtobýsynyń 54 jastaǵy júrgizýshisi S.Muqanov kóshesiniń boıymen kele jatyp jol apatyna ushyrady. Qazirgi málimet boıynsha, qoǵamdyq kólik júrgizýshisi jol boıynda turǵan «KamAZ» júk kóliginiń tirkemesin baıqamaı qalǵan.
Jol-kólik oqıǵasynyń saldarynan 2 jolaýshy jáne avtobýs kondýktory túrli jaraqattarmen aýrýhanaǵa jetkizildi.
«Jol-kólik oqıǵasynyń saldarynan basyna zaqym kelgen, mıy shaıqalǵan jáne jaraqat alǵan úsh adam H.Maqajanov atyndaǵy kópsalaly aýrýhanaǵa jatqyzyldy. Zardap shekken bir adamǵa oqıǵa ornynda kómek kórsetildi», - dep málim etti oblystyq Densaýlyq saqtaý basqarmasyndaǵylar.
Jol-kólik oqıǵasy kezinde avtobýs salonynda 6 adam bolǵan.
«Avtobýs júrgizýshisine qatysty QR QK 610-babynyń 2-bólimi boıynsha ákimshilik óndiris bastaldy», - dep habarlady Qaraǵandy oblysy PD baspasóz qyzmeti.
