Qaraǵandyda avtobýs jaıaý júrginshiler jolynda áıeldi qaǵyp ketti
QARAǴANDY. QazAqparat – Qaraǵandyda qalalyq avtobýs júrgizýshisi jaıaý júrginshiler jolymen ótpekshi bolǵan 62 jastaǵy áıeldi qaǵyp ketti. Zardap shekken áıel jansaqtaý bóliminde jatyr, dep habarlaıdy QazAqparat tilshisi.
Oqıǵa Maıqudyq aýdanyndaǵy meshittiń janynda bolǵan. Oqys oqıǵa Instagram-daǵy Qaraǵandy oblysyna tanymal paraqshada jarııalandy. Vıdeoda áıel jaıaý júrginshiler jolyna shyǵa bergen bette, ony birden avtobýs qaǵyp ketkeni kórinedi.
«29 qańtarda Qaraǵandy qalasynyń Oktıabr aýdanynda «ıÝtong» avtobýsynyń 29 jasar júrgizýshisi K. Marks kóshesiniń boıymen Vostok-3 shaǵyn aýdan jaǵynan Magnıtogorskaıa kóshesine qaraı kele jatqan 62 jastaǵy qala turǵynyn qaǵyp ketken», - dep habarlady Qaraǵandy oblysy PD baspasóz qyzmeti.
Jol-kólik oqıǵasynan zardap shekken adam túrli jaraqatpen medıtsınalyq mekemege jetkizildi.
«Zardap shekken áıel Qaraǵandy qalasynyń №1 kópbeıindi aýrýhanasyna jabyq bas mı jaraqatymen, bas mıy shaıqalýmen túsken. Sondaı-aq onyń qabyrǵalary synǵan. Jaǵdaıy aýyr, jansaqtaý bólimshesinde jatyr», - dep túsindirdi Qaraǵandy oblysynyń Densaýlyq saqtaý basqarmasynyń baspasóz qyzmeti.
Qazirgi ýaqytta tıisti saraptamalar taǵaıyndalyp, tergeý júrgizilýde.
