Qaraǵandyda avtobýs baǵdarshamnyń jasyl túsine ótken balany qaǵyp ketti
QARAǴANDY. QazAqparat - Qaraǵandyda avtobýs júrgizýshisi jaıaý júrginshiler jolyn baǵdarshamnyń jasyl túsine ótip bara jatqan balany qaǵyp ketti, dep habarlaıdy QazAqparat tilshisi Qaraǵandy oblysy PD baspasóz qyzmetine silteme jasaı otyryp.
17 aqpan kúni 27 jasar avtobýs júrgizýshisi Qaraǵandy qalasynyń Buqar jyraý dańǵylynan Erýbaev kóshesine qaraı bara jatyp, 10 jasar balany qaǵyp ketti.
Aıta ketý kerek, bala kósheni baǵdarshamnyń jasyl belgisine ótip bara jatqan. Zardap shekken bala aýrýhanaǵa jetkizildi.
«Zardap shekken balany H. J. Maqajanov atyndaǵy kópbeıindi aýrýhananyń jaraqat pýnktine jetkizdi. Onyń shyntaǵyna zaqym kelgen. Dárigerlerdiń tekserisinen keıin ol ambýlatorlyq emdelýge jiberildi», - dep habarlady oblystyq Densaýlyq saqtaý basqarmasynyń baspasóz qyzmeti.
Atalǵan derek boıynsha polıtsııa qyzmetkerleri QK 345-babynyń 2-bóligi boıynsha sotqa deıingi tergeý jumystaryn bastady. Tıisti saraptamalar taǵaıyndalyp, tergeý júrgizilýde.
