Qaraǵandyda avtobýs áıeldiń aıaǵyn basyp ketti
QARAǴANDY. QazAqparat - Qaraǵandyda avtobýs 50 jastaǵy áıeldiń aıaǵyn basyp ketti. Qazir ol jansaqtaý bóliminde jatyr, dep habarlaıdy QazAqparat tilshisi.
Osy is boıynsha sotqa deıingi tergep-tekserý amaldary bastalyp ketti.
Polıtsııanyń habarlaýynsha, oqys oqıǵa dúısenbi kúni tańǵy 8:23-te Qaraǵandynyń Maıqudyq aýdanyna kireberistegi aıaldamada bolǵan. №118 jolaýshy avtobýsy qala turǵynynyń aıaǵyn basyp ketken.
«Avtobýstyń dóńgelegi áıeldiń aıaǵyn basyp ketken. Qazir polıtsııa júrgizýshini kinásin anyqtaý úshin jumys júrgizip jatyr», - deıdi №3 avtopark dırektory Artýr Grıgorıan.
Qaraǵandy oblystyq densaýlyq saqtaý basqarmasynyń ókilderi jábirlenýshi qazir jansaqtaý bóliminde jatqanyn habarlady.
«Áıeldiń jasy 50-den asqan. Ol aıaqtyń ashyq syný jaraqatymen aýrýhanaǵa jetkizildi. Shuǵyl túrde ota jasaldy. Qazir onyń jaǵdaıy turaqty. Dárigerler búgin palataǵa shyǵarý jaıyn josparlap jatyr», - deıdi vedomstvonyń baspasóz hatshysy Aıjan Isa
«Osy fakti boıynsha sotqa deıingi tergep-tekserý bastaldy. Tıisti saraptamalar belgilendi. Tergeý amaldary júrip jatyr. Júrgizýshige qatysty «eshqaıda ketpeý» bultartpaý sharasy qoldanyldy», - dep málimdedi Qaraǵandy oblystyq ishki ister departamentiniń baspasóz qyzmeti.
