Qaraǵandyda avtobýs apatynan zardap shekken 19 jastaǵy jolaýshy kóz jumdy

QARAǴANDY. QazAqparat - Qaraǵandyda eki avtobýstyń soqtyǵysýy kezinde zardap shekken naýqastardyń biri aýrýhanada qaıtys boldy, dep habarlaıdy QazAqparat tilshisi.

Birneshe saǵat buryn Maqajanov atyndaǵy kópsalaly aýrýhanada eki avtobýstyń soqtyǵysýy kezinde zardap shekken jolaýshylardyń biri qaza tapty.

«2003 jyly týǵan naýqas ómir súrýge múmkindik bermeıtin aýyr jaraqattar saldarynan qaıtys boldy. Qalǵan zardap shekkenderdiń dınamıkasy turaqty», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.

Esterińizge sala keteıik, búgin tańerteń Qaraǵandyda eki jolaýshy avtobýsy soqtyǵysqan bolatyn. Apat saldarynan bir avtobýstyń júrgizýshisi qaza tapty.

Dárigerler habarlaǵandaı, qala aýrýhanalaryna zardap shekken 18 naýqas túsken. Onyń tórteýi aýyr jaǵdaıda.