Qaraǵandyda aýyldyq jas kásipkerlerge granttar tabys etildi
QARAǴANDY OBLYSY. QazAqparat - Qaraǵandy oblysynyń Buqar Jyraý aýdanynda Buqar Jyraý Qalqamanulynyń 350 jyldyǵyna arnalǵan Jastar forýmy ótti. Shara barysynda 10 jas kásipkerge Qaraǵandy oblysy ákiminiń granttary tabys etildi, dep habarlaıdy QazAqparat.
Qaraǵandy oblysynyń ákimdiginen málim etkendeı, XV Aýyl jastarynyń forýmy Buqar Jyraý aýdanynyń Botaqara kentindegi stadıonda ótti.
Oǵan Qaraǵandy oblysynyń ákimi Erlan Qoshanov, QR Qoǵamdyq damý mınıstrligi Jastar saıasaty departamentiniń dırektory Ashat Oralov jáne májilismen Serik Sápıev qatysty.
Forýmnyń negizgi maqsaty - aýyl jastarynyń problemalaryn anyqtaý jáne olardy sheshý, atqarýshy organdar men úkimettik emes uıymdardyń osy baǵyttaǵy birlesken jumysyn úılestirý. Buǵan qosa, qatysýshylarǵa aýyldyq jerlerde turatyn jastarǵa memlekettik áleýmettik qoldaý kórsetý sharalary týraly aıtyldy.
Shara barysynda, sondaı-aq aýyldyq jas kásipkerlerge óz isin ashýǵa arnalǵan oblys ákiminiń granty tabys etildi. Úmitkerler baıqaý qorytyndysy boıynsha irikteldi. Olar aldyn ala ótinimderin jiberip, óz bıznes-jobalaryn arnaıy komıssııa aldynda qorǵady. Aımaq basshysy ár jeńimpazǵa bir mıllıon teńgege sertıfıkattardy tapsyrdy.
«Sizderge men árdaıym erekshe jaqsy kóńil-kúımen kelemin. Sebebi ózim de aýylda týyp-óstim. Sizderdiń ómirlerińiz,osy qoıylyp otyrǵan saýaldaryńyz maǵan óte tanys jáne jaqyn. Búgin men osynda sizdermen áńgimelesip, aýyl jastary búgingde qalaı ómir súrip jatqanyn bilý úshin kelip otyrmyn. Biz árdaıym aýyl jastarynyń problemalarymen aınalysamyz, olardy sheshý joldaryn izdeımiz. Jastardyń basym bóligin damý, bilim alý múmkindikteri, baspana jáne laıyqty ómir súrýge qatysty suraqtar tolǵandyrady. Jyl saıyn aýyldaǵy kásipkerlikti qoldaýǵa kóbirek qarajat salynýda. Jastar kóterilip, bolashaqqa josparlar quryp, óz bıznesterin damytyp jatqanyn kórý óte qýanyshty», - dedi Erlan Qoshanov Forýmǵa qatysýshylar aldynda sóz sóıleý barysynda.
Málim bolǵandaı, grantty ıelengen jas kásipkerler Jumyspen qamtý organdarynda tirkeýde turǵan bir jumyssyzdy jumysqa turǵyzyp, bes aı aralyǵynda 40 000 teńge kóleminde stıpendııa tólep turýy tıis.
