Qaraǵandyda aýyl sharýashylyǵy ónimderiniń jármeńkesi ótti
QARAǴANDY. QazAqparat - Qaraǵandyda bıylǵy jylǵy birinshi oblystyq «Aýyl bereke» aýyl sharýashylyǵy ónimderiniń jármeńkesi ótti. Munda ónimder quny naryqtyq baǵadan shamamen 20%-ǵa tómen, dep habarlaıdy óńir basshysynyń resmı saıty.
Sıyr nemese qoı etinniń bir kelisin jármeńkede 1400 teńgege alýǵa bolady, jylqy eti – 1800, shoshqa etin 1100 teńgege satady. Birinshi sanatty jumyrtqanyń on danasy 220 teńge, bir lıtr úı sútin de osy baǵamen satyp alýǵa bolady. Munda kartop 60 teńgeden, sábiz 55 teńgeden, qyryqqabat 70 teńgeden satylýda. Jármeńkege barlyǵy 550 tonna ónim ákeldi: 52 tonna et, 300 tonnadan astam kókónis jáne taǵy basqalar. Munda barlyǵy 144 taýar ataýy usynylǵan. – Mundaı jármeńkeler satýshylarǵa da, satyp alýshylarǵa da tıimdi. Fermerlerge deldalsyz satýǵa yńǵaıly, al arzan baǵamen olar óte kóp satady. Al satyp alýshylarǵa azyq-túlikti sýpermarketter men bazarlarǵa qaraǵanda arzanyraq satyp alý tıimdi, - deıdi Qaraǵandy oblysy ákiminiń orynbasary Serik Shaıdarov. Jármeńkedegi eń tanymal taýar et boldy. Kóptegen kelýshiler ony úlken kólemde satyp aldy. - 1400-den sıyr etin qaıdan satyp alamyz? Dúkenderde onyń bir kelisi 2000 teńgege jýyq bolady. Bizdiń otbasymyz úlken emes, sondyqtan jármeńkede qysqa et satyp ala alamyn. Men jaqsy etti tómen baǵamen tańdap alý úshin arnaıy Maıqudyqtan tańerteń erte keldim, - deıdi zeınetker Valentına Natkovskaıa. Jármeńkede usynylǵan taýarlar tek azyq-túliktermen ǵana shektelip qalǵan joq. Mysaly, «Jan Dos» múgedekter qoǵamdyq birlestiginiń ókilderi munda ózderi óndiretin tósek jabdyqtaryn usyndy. Eki oryndyq kereýetke maqta matasynan jasalǵan tósek jıyntyǵyn 7500 teńgege satyp alýǵa bolady. Al 1,5 oryndyq tósekke arnalǵan jıyntyqtar 4000 teńgeden bastaldy. Munda sondaı-aq aıaq kıim, shulyqtar jáne qol oramaldar saýdalandy. Bıylǵy jyly Qaraǵandyda taǵy eki jármeńke ótkizý josparlanýda – 26 qazan jáne 9 qarashada.
