Qaraǵandyda aýlalardaǵy sport alańdarynda jattyqtyrýshylar jumys isteıdi
QARAǴANDY. QazAqparat - Qarǵandyda daladaǵy sport alańdaryna jattyqtyrýshylar men ádiskerler jumyldyrylatyn bolady. Bul týraly Qaraǵandy oblystyq dene shynyqtyrý jáne sport basqarmasynyń jetekshisi Dmıtrıı Karpov málim etti.
«Biz oblysymyzdyń qalalary men aýyldarynda sporttyq alańdardy jabdyqtaımyz. Olardyń ashylý saltanattaryna jattyqtyrý quraldaryn qalaı paıdalaný kerektigin kórsetetin sportshylardy shaqyrtamyz. Alaıda, tájirıbe kórsetip turǵandaı, jabdyqtar qur bosqa turady. Jastardy jumyldyryp, olarǵa baǵyt berý qajet. Sondyqtan biz bul alańdarǵa jattyqtyrýshylardy, ádiskerler men aýla klýbtarynyń ókilderin jumyldyrýdy jón kórdik. Sport alańdaryna keshki ýaqyttarda shyǵyp, balalardy jınap, olarǵa jattyǵýlar qalaı jasalatynyn úıretetin adamdar qajet. Biz bul baǵytta belsendi jumystardy josparlap otyrmyz», - dedi Dene shynyqtyrý jáne sport basqarmasynyń jetekshisi.
Buǵan qosa, Dmıtrıı Karpovtyń aıtýynsha, 2019-shy jyly oblysta 8 myńnan astam sporttyq-buqaralyq sharalar ótedi. Trıatlon boıynsha ekinshi chempıonat, ótken jylǵydaı Qaraǵandy qalasynyń ortalyq kóshelerinde ótetin sertıfıkattalǵan trassa boıynsha jartylaı marafon uıymdastyrylady.
Óńirde alǵash ret otbasylarǵa arnalǵan aralas estafeta ótedi, onda júgirý jáne velokross sporty qarastyrylǵan. Atalmysh shara aǵymdaǵy jyldyń maýsymynda ótedi dep josparlanýda.
