Qaraǵandyda aýdarylǵan júk kóliginen 15 tonna kúkirt qyshqyly tógildi
QARAǴANDY. QazAqparat - Qaraǵandy oblysyndaǵy jol boıynda júk kóligi aýdarylyp qaldy. Apat saldarynan jolǵa 15 tonna kúkirt qyshqyly tógildi, dep habarlaıdy QazAqparat tilshisi.
Búgin, 14 jeltoqsan kúni Buqar jyraý aýdanynynda, «Almaty-Ekaterınbýrg» avtojolynyń 995-shi shaqyrymynda, Qaraǵandy qalasynan 11 shaqyrym jerde «MAZ» markaly avtomobıl jol jıegine aýdaryldy.
«Jol apaty saldarynan 20 sharshy metr ashyq jerge 15 tonna kúkirt qyshqyly tógilip, jolǵa jaıyldy», - dep habarlady Qaraǵagdy oblysy TJD baspasóz qyzmetinde.
Jaraqat alǵan 1971 jyly týǵan júrgizýshi aýrýhanaǵa jatqyzyldy. Jaǵdaıy ortasha.
«Zardap shekken adam ortasha aýyr halde H. Maqajanov atyndaǵy kópsalaly aýrýhanaǵa jetkizildi. Naýqasty neırohırýrg qarady. Dıagnoz - soǵylǵan jaraqat, beri tyrnalǵan. Ol ambýlatorııalyq em alýǵa jiberildi», - dep málimdedi densaýlyq saqtaý basqarmasynda.
Oqıǵa ornynda Qaraǵandy oblysy TJD 19 qyzmetkeri jáne 4 tehnıkasy, jergilikti polıtsııa qyzmeti, QR TJM áskerı bólimi jáne ekologııa departamenti jumys isteýde.
Qutqarýshylar kólik júrgizýshilerin tómen temperatýrada, joldy qar basýy jáne kóktaıǵaq kezinde múmkindiginshe jolǵa shyqpaýǵa shaqyrady.
Jol nashar kórinetin bolsa, qalypty jyldamdyqty tańdap, jaryq aspaptaryn paıdalaný mańyzdy ekenin eske salady.
