Qaraǵandyda atyshýly týrfırmanyń ıesine jaza merzimi qysqartyldy
Qaraǵandynyń Qazybek bı aýdandyq № 1 sotynyń baspasóz qyzmetinen málim etkendeı, týrısterdi aldap, olardyń Túrkııaǵa ushýyn uıymdastyrmaǵan J.Ábeýpke «QR Táýelsizdiginiń 25 jyldyǵyna baılanysty raqymshylyq jasaý týraly» zańǵa sáıkes, úkim boıynsha taǵaıyndalǵan jaza merzimi ózgertildi. Sotqa qylmystyq-atqarý júıesi departamentiniń probatsııa qyzmetinen jáne Janar Ábeýptiń ótinishi kelip tústi, onda qabyldanǵan raqymshylyqqa baılanysty jazalaý merzimin qysqartý týraly másele aıtylǵan.
«Búgingi kúni Janar Ábeýptiń ótelmegen jaza merzimi 3 jyl 3 aı jáne 22 kúndi quraıdy. «QR Táýelsizdiginiń 25 jyldyǵyna baılanysty raqymshylyq jasaý týraly» zań negizinde bul merzin teń jartysyna qysqarady. Osylaısha, óteýge 1 jyl 7 aı jáne 26 kún jatady», - dep habarlady sottyń baspasóz qyzmetinen.
Eske salaıyq, «Faraon» týrfırmasynyń dırektory alaıaqtyq úshin 2016 jyldyń 30 qyrkúıegi kúni jalpy rejimdegi kolonııaǵa 4 jyl 6 aıǵa toǵytylǵan bolatyn. Atalmysh fırmada Túrkııaǵa joldamalar satyp alǵan klıentter «Saryarqa» áýejaıynan ushyp kete almady. Aldanǵan adamdar polıtsııaǵa shaǵymdandy. Olardyń denine Janar Ábeýp aqshalaryn qaıtaryp berdi. Biraq 100 adam 400 myń dollar kólemindegi qarjylaryn ala almady. Týrfırma 2015 jyldyń 9 shildesinde bankrot bolǵandyǵyn jarııalady. Ábeýp abaqtyda otyryp sábıin dúnıege ákeldi. Qazir qyz bala 1 jasqa toldy. Bala anasymen birge kolonııada.
