Qaraǵandyda atyshýly adam ólimine qatysty úkim shyqty
QARAǴANDY. QazAqparat - Qaraǵandy oblysy Abaı qalasynyń turǵyny astanalyq Erbolat Jaqsygeldındi óltirgeni úshin 16 jylǵa bas bostandyǵynan aıyryldy, dep habarlaıdy «QazAqparat» HAA tilshisi.
Atyshýly qylmys ótken jyldyń 23 qyrkúıeginde oryn aldy. Eki balanyń ákesi Erbolat Jaqsygeldın óziniń avtomobılimen shyǵyp ketip, iz-túzsiz joǵalǵan. Uıaly telefonyna kelgen qońyraýlarǵa jaýap bermegen. Týystary quqyq qorǵaý organdaryna onyń joǵalǵandyǵy týraly ótinish jazǵan. Sebebi, ol buryn-sońdy otbasynan uzaq ýaqytqa eskertýsiz ketpegen.
Bir aı ótkennen keıin, 30 qazanda, Qaraǵandy oblystyq ishki ister departamentiniń qyzmetkerleri Abaı qalasynyń mańynan sýǵa batqan avtomobıldi kórgen. Polıtseıler kólikti jaǵaǵa shyǵaryp, ishinen Astana turǵynynyń máıitin tabady.
Tergeý barysynda Qaraǵandy oblysynyń polıtseıleri 30 jastaǵy Jeńis Qaıyrjanovty kúdikti retinde tutqyndady . Anyqtalǵandaı, Erbolat Jaqsygeldın Abaı qalasynyń turǵyny Jeńis Qaıyrjanovtyń úıine qonaqqa kelgen. Tergeý nusqasy boıynsha, úıdiń ıesi áıelin qyzǵanǵandyqtan janjal oryn alyp, adam óltirýge sebepshi bolǵan. Qylmysker Astana turǵynyn birneshe ret jaraqattap, saldarynan er kisi qaza tapqan.
Qaraǵandy oblystyq mamandandyrylǵan aýdanaralyq sotynyń sýdıasy Jeńis Qaıyrjanovqa QR Qylmystyq kodeksiniń 99-baby «adam óltirý» jáne 202-baby «Bótenniń múlkin qasaqana joıý nemese búldirý» boıynsha aıypty dep tanyp, 16 jyl bas bostandyǵynan aıyrý jazasyn taǵaıyndady.
«Qylmystyq kodekstiń 99-baby boıynsha sottalýshyǵa 15 jyl, al 202-bap boıynsha - bir jyl bas bostandyǵynan aıyrý taǵaıyndaldy. Jeńis Qaıyrjanov qatań rejımdegi kolonııada 16 jyl jazasyn óteıtin bolady», - dep úkim shyǵardy sýdıaBekzat Shalǵymbaev.
Sonymen qatar, sýdıa qaza tabýshynyń aǵasynyń shaǵymyn qanaǵattandyryp, sottalýshyǵa bir aıdyń ishinde moraldyq qaıǵy-qasiret úshin bir jarym mıllıon teńge kóleminde ótemaqy tóleýge mindettedi.
Sondaı-aq, sottalýshy óziniń ar-namysy men áıeliniń abyroıyn qorǵaǵanyn alǵa tartyp, úkimge shaǵym túsirmekshi.
Buryn sot zalynda qaza tabýshy men sottalýshynyń týystarynyń arasynda janjal týǵan edi. Qaza tapqan Astana turǵynynyń otbasy sottalýshyǵa til tıgizgen. Sýdıa jábirlenýshiniń otbasyna sot zalynda osyndaı tártip buzýshylyq qaıtalansa, iri kólemde aıyppul salyp, ákimshilik jazaǵa tartatynyn eskertken.
