Qaraǵandyda Astananyń 20 jyldyǵyna arnalǵan kadet keshi ótti
QARAǴANDY. QazAqparat - Qaraǵandyda Astananyń 20 jyldyǵyna oraı «Vıvat, kadet!» atty jyl saıynǵy besinshi kadet keshi ótti, dep habarlaıdy QazAqparat tilshisi.
«Biz mereıtoılyq besinshi kadet keshin ótkizdik. Mektep qabyrǵasynda bes jyl buryn alǵash ret kadet synyptary ashylǵan bolatyn. Jyl saıyn jas kadetterdiń qatary tolyǵyp jatyr. Bul joly sharaǵa úsh júz oqýshy qatysty. Biz jyl boıyna daıyndaldyq. Oqýshylar bı negizderin úırendi, eńbegimiz zaıa ketpedi dep oılaımyn», - dedi №58 orta mektep dırektory Tatıana Balǵabekova.
Qatysýshylar is-sharany klassıkalyq bal retinde ótkizýge tyrysty. QR Ulttyq gvardııasynyń «Ortalyq» óńirlik qolbasshylyǵy áskerı orkestri de qatysty, dástúrli baldyq bıler - polonez jáne vals boldy.
«Kadetter qataryna balalar 5 jastan bastap qabyldanady. Kadet synybyna túsý úshin oqýshylar dene tárbıesinen, matematıkalyq logıkadan emtıhan tapsyrady. Psıhologpen jáne áskerı tárbıeshilermen áńgimelesýden ótedi. Qazir Qaraǵandy oblysy boıynsha kadet synyptary bar 11 mektep jumys jasaıdy, al qalanyń ózinde - 7», - dedi bal uıymdastyrýshylary.
Ilıa Grıgorev - Qaraǵandy qalasynyń №58 orta mektebiniń 6-synyp oqýshysy. Kadetter qatarynda júrgenine - 2 jyl. Ol úshin kadet baly - óte mańyzdy ári aıtýly shara.
«Bul - men úshin jup bolyp bılegen ekinshi bal. Al mektepte kadetterdiń qosymsha sabaqtaryn ótkizbeımin. Mysaly, men avtomattardy shashyp, qaıta jınaǵandy unatamyn. Sondaı-aq, biz ártúrli baıqaýlarǵa qatysyp, únemi júldeli oryndardy ıelenemiz», - dep bólisti bal qatysýshysy.
Tanystyrý sharasy bal hanshaıymynyń shyǵýymen jáne barlyq qatysýshylardyń bıimen jalǵasty. 300-den astam oqýshy, 100-den asa jup bir ýaqytta klassıkalyq bılerin pash etti. Úsh saǵattyq baǵdarlamada jas kadetter jıyrmadan astam óner kórsetti.
Qurmetti qonaqtar tiziminde oblystyń jáne qalanyń basqarýshy qurylymdarynyń ókilderi, ardagerdik uıymdar ókilderi, sondaı-aq, Qaraǵandy garnızonynyń áskerı bólimderiniń komandırleri boldy.
