Qaraǵandyda «Ashyq» jobasyna qatysatyn mekemeler túngi 12-ge deıin jumys isteı alady

QARAǴANDY. QazAqparat - Qaraǵandy qalasynda «Ashyq» ilki jobasyn iske asyrýǵa qatysatyn kompıýter klýbtary men boýlıng ortalyqtaryna saǵat 24.00-ge deıin jumys isteýge ruqsat berildi. Al 1-5 synyp oqýshylarynyń mektepterde oqýǵa ruqsat etilgen sany 25 adamǵa deıin arttyryldy, dep habarlaıdy QazAqparat tilshisi.

Qaraǵandy oblysynyń Bas memlekettik sanıtarııalyq dárigeriniń 2021 jylǵy 19 qańtardaǵy № 2-Q qaýlysyna ózgerister men tolyqtyrýlar engizildi. Oǵan sáıkes kelesideı sheshimder qabyldandy:

- Qaraǵandy qalasynyń aýmaǵynda ornalasqan jáne «Ashyq» jobasyn iske asyrýǵa qatysatyn kompıýter klýbtary men boýlıng ortalyqtarynyń jumys rejımi saǵat 12.00-den 24.00-ge deıin belgilendi. Nysandar tolymdyǵy 75 paıyzdan aspaýy tıis;

- mektepaldy synyptarda, orta bilim beretin mektepterdegi 1-5 synyptarda, halyqaralyq mektepterdegi 1-7 synyptarda oqýshylar sanynyń lımıti 25 adamǵa arttyryldy;

Budan basqa, medıtsınalyq joǵary oqý oryndary men medıtsınalyq kolledjderdiń stýdentteri medıtsınalyq uıymdarda praktıka bastalar aldynda mindetti túrde PTR testileýden ótedi.

Sondaı-aq, qalalar men aýdandardyń Bas memlekettik sanıtarııalyq dárigerleri Qazaqstan Respýblıkasynyń Bas memlekettik sanıtarııalyq dárigeriniń 05.03.2021 jylǵy №10 qaýlysyna 4-qosymshaǵa sáıkes ólshemsharttary negizinde áleýmettik-ekonomıkalyq obektilerdiń qyzmetin shekteýdi qamtamasyz etýi tıis.

Bul rette, shekteý sharalaryn qatańdatý epıdemıologııalyq jaǵdaı 5 kún ishinde kúrdelengen jaǵdaıda («jasyl» aımaqtan «sary» aımaqqa nemese «qyzyl» aımaqtan «saryǵa» kóshý) júrgiziledi, karantındik sharalardy jeńildetý «sary» aımaqqa «qyzyl» aımaqtan nemese «jasyl» aımaqqa «sary aımaqtan» kóshkennen keıin 7 kúnnen erte júrgizilmeıdi.