Qaraǵandyda aşy sýǵa masaıǵan serjant kólik aıdap áketti
QARAǴANDY. 13 mamyr. QazAqparat - Qaraǵandyda QR Qorǵanys mınıstrligine qarasty áskerı bólimderdiń birinde kelisim-shartpen qyzmet etetin 28 jastaǵy er adam ustaldy. Aşy sýǵa masaıǵan ol Volkswagen kóligin aıdap áketken. Bul týraly Qaraǵandy oblystyq ІІD baspasóz qyzmeti habarlaıdy.
«Ótken demalys kúnderi Qaraǵandy qalalyq ІІB Ońtústik-Shyǵys polıtsııa bólimine bir JShS-niń júrgizýshisi júginip, onyń Volkswagen qyzmettik kóligi aýladan qoldy bolǵanyn málim etken. Jol saqshylary «Qaraǵandy-Úshtóbe» tasjolynda aıdap áketilgen kólikti anyqtady. Onyń tizgininde áskerı bólimderdiń biriniń 28 jastaǵy serjanty mas kúıinde otyrǵan», - dep kórsetilgen baspasóz habarlamasynda.
Búgingi tańda atalmysh jaıt boıynsha qylmystyq is qozǵalyp, tergeý jumystary qolǵa alynǵan.
Sonymen qatar ótken demalys kúnderi óńirdegi Petrovka aýylyndaǵy qus fabrıkasynyń aýmaǵynan tirkemesi bar KamAZ aıdap áketilgen. «Buqar jyraý aýdandyq ІІB tergeý-jedel toby kólikti aıdap áketken 19 jastaǵy jigitti quryqtady. Al kólik ıesine qaıtaryldy», - dep jazylǵan Qaraǵandy oblystyq ІІD baspasóz qyzmetiniń habarlamasynda.
Qus fabrıkasynyń burynǵy jumysshysy kólikpen serýendeýdi uıǵaryp, zańnyń ala jibin attaǵan. Endi ol qylmystyq jaýapkershilikke tartylady.
