Qaraǵandyda arnaýly jıynǵa shaqyrtylǵan eriktiler oqýdan ótýde
QARAǴANDY. QazAqparat – Qaraǵandyda qorǵanys isteri jónindegi departamenttiń oblystyq jıyn pýnktinde arnaýly jıynǵa shaqyrylǵan eriktilerdi oqytý bastaldy, dep habarlaıdy QazAqparat tilshisi.
Arnaıy oqýdan ótken soń olardy qala aýmaǵyn sanıtarlyq óńdeý otrıadtaryna qatystyrady. Sondaı-aq, áskerge shaqyrylǵandar blok beketterde kezekshilik etip, Qalalyq jedel shtab jumysyna kómektesedi.
Qaraǵandyda 150-den astam er adam ótinish bildirdi, olardyń 95 áskerge shaqyrylǵandar iriktelip alyndy. Rezervshiler tek oblys ortalyǵynda ǵana tańdaldy. Oblystyń basqa qalalary men aýdandarynda arnaýly jıyndar ótkizý ázirge josparlanyp otyrǵan joq.
«Bul qıyn ýaqytta eshkim ortaq isten tys qalmaýy tıis. «Jas sarbaz» qozǵalysyndaǵy meniń áriptesterim arnaýly jıyndarda qyzmet ótkerý úshin alǵashqylardyń biri bolyp kelgenin maqtan tutamyn. Men de áskerı mindettiler retinde óz úlesimdi qosý týraly sheshim qabyldadym. Bul bizdiń boryshymyz», - deıdi Qaraǵandy oblysy boıynsha «Jas sarbaz» QB tóraǵasy Rýstam Janalıev.
Áskerge shaqyrylýshylardyń barlyǵy derlik kezinde Qarýly Kúshterde qyzmet atqaryp, onyń erekshelikterin meńgergen.
Áskerı mindettiler shaqyrylǵannan bastap áskerı qyzmetshiler mártebesine ıe bolady. Olardyń barlyǵy jalaqy, sondaı-aq zań boıynsha tıisti jeńildikter men áleýmettik kepildikter alady.
Esterińizge sala keteıik, Prezıdent Qasym-Jomart Toqaev Qazaqstan Respýblıkasy Qarýly Kúshteriniń aýmaqtyq áskerlerin jasaqtaý úshin áskerı mindettilerdi arnaýly jıyndarǵa shaqyrý týraly Jarlyqqa qol qoıǵan bolatyn. Jergilikti atqarýshy organdarǵa áskerı mindettilerdiń sanyn jáne arnaýly jıyndardy ótkizý merzimin anyqtaý tapsyryldy.
