Qaraǵandyda arnaýly ortalyqtaǵy bala ólimin tekseretin arnaıy komıssııa quryldy
Arnaıy komıssııa quramyna oblystyq jumyspen qamtýdy úılestirý jáne áleýmettik baǵdarlamalar jáne densaýlyq saqtaý basqarmalarynyń basshylary, polıtsııa departamenti bastyǵynyń orynbasary, Eńbek jáne áleýmettik qorǵaý komıteti departamentiniń basshysy, sanıtarlyq-epıdemıologııalyq baqylaý departamenti basshysynyń m.a., medıtsınalyq jáne farmatsevtıkalyq baqylaý komıteti departamentiniń basshysy, Qaraǵandy oblysy ákimi apparatynyń kámeletke tolmaǵandardyń quqyqtaryn qorǵaý jáne otbasylyq-demografııalyq saıasat jónindegi bas ınspektory kirdi.
Ortalyqta dırektordyń mindetin atqarýshy taǵaıyndaldy.
«Barlyq balalar psıhıatr-dárigerlerdiń, nevropatologtardyń qatysýymen tekseriledi.
Vedomstvolyq baǵynysty mekemelerdiń qosymsha medıtsına qyzmetkerleri tartyldy.
Densaýlyq saqtaý basqarmasymen, sondaı-aq jumyspen qamtýdy úılestirý jáne áleýmettik baǵdarlamalar basqarmasynyń qyzmetkerleri qatarynan dárigerlerdiń turaqty kezekshiligi uıymdastyryldy.
Qazirgi ýaqytta sanıtarlyq-epıdemıologııalyq qyzmet, Eńbek jáne áleýmettik qorǵaý komıtetiniń departamenti, Medıtsınalyq jáne farmatsevtıkalyq baqylaý departamenti 30 kúnge deıin sozylatyn tekserýler júrgizýde», - dep málimdedi Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasynda.
Atalmysh jaıt boıynsha qylmystyq is qozǵaldy. Tergeýmen oblystyń arnaıy prokýratýrasy aınalysady.
Esterińizge sala keteıik, 30 shildede Qaraǵandy oblysynyń balalarǵa arnaýly áleýmettik qyzmet kórsetý ortalyǵynda birneshe bala ýlanyp, onyń bireýi qaıtys boldy, altaýy jansaqtaý bóliminde jatyr.
Bas prokýratýra ýákiletti memlekettik organdar men aýmaqtyq prokýrorlarǵa elde osyndaı mekemelerge keshendi tekserýler uıymdastyrýdy tapsyrdy
QR Densaýlyq saqtaý mınıstri Ajar Ǵınııat habarlaǵandaı, ishek ınfektsııasyna júrgizilgen synaq teris nátıje berdi. Balalardyń neden ýlanǵany áli anyqtalmady.
