Qaraǵandyda «Armanǵa jol-2019» jartylaı marafony ótedi
QARAǴANDY. QazAqparat - Jyl saıyn ótetin «Armanǵa jol» jartylaı marafony Qaraǵandy qalasynda 19 mamyrda ótedi. Qatysýshylardy tirkeý bastaldy, erejeler men baǵyttar da belgilenip qoıdy, dep habarlaıdy QazAqparat tilshisi.
Sharany uıymdastyrýshylar nıet bildirýshilerdi túrli qashyqtyqtarǵa júgirýge shaqyrady. Olardyń eń bastysy - Armanǵa jol jartylaı marafony (21 shaqyrym). «Spýtnık» dep atalatyn ekinshi dıstantsııanyń uzyndyǵy -14 shaqyrym. Bul dodaǵa qatysýǵa tek kámeletke tolǵandarǵa ǵana ruqsat beriledi.
Kez kelgen jastaǵy jáne múmkindigi shekteýli qatysýshylar uzyndyǵy 7 shaqyrymdy quraıtyn «Dostyq» dıstantsııasyn júgirip óte alady. Al 8-den 13 jas aralyǵyndaǵy balalardy eki shaqyrymǵa sozylǵan «Balapan» qashyqtyǵyna shaqyrady.
Bıylǵy jyly skandınav júrisi boıynsha bólek nomınatsııa qosylǵan. Oǵan qatysýshylar 7 shaqyrymdy júrip ótýleri kerek, júrýge arnalǵan taıaqty ózderimen birge ala kelýleri tıis.
«Armanǵa jol» basty júgirý dodasy aqyly. Oǵan qatysý úshin 2000 teńge tóleý qajet. Qalǵan qashyqtyqtarǵa júgirý úshin tólem jasaýdyń qajeti joq.
Sharaǵa qatysý úshin ótinishti marafonnyń saıtyna tapsyrýǵa bolady. Árbir qatysýshy tirkeý nómirine jeke kýáliginiń nemese týý týraly kýáliktiń kóshirmesin, óz densaýlyǵy úshin ózi jaýap beretini týraly qolhat bekitýi tıis. Al 8-13 jastaǵy balalar ata-analarynyń atynan ruqsattama usynýlary kerek.
Búgingi tańda jartylaı marafonǵa 541 qatysýshy tirkelip qoıdy. Osy kúnge deıin ótinish bergenderdiń arasynda 14 shaqyrymdyq qashyqtyqty júgirip ótemiz dep nıet bildirýshiler sany 730 adamnan asqan. «Dostyq» dıstantsııasyna ótinish bergender sany 1800 adamnan asady, al «Balapan» dodasyna 400-den astam ótinish kelip túsken.
Tegin jattyǵýlar osy jeksenbide Ortalyq mádenıet jáne demalys saıabaǵynda ótedi.
«Armanǵa jol» qaraǵandylyq jartylaı marafony alǵash ret 2017 jyldyń 3 maýsymynda ótken bolatyn. Endi bul jarys jyl saıyn ótetin dástúrli jarysqa aınalyp, turaqty ótkizý ýaqyty mamyr aıynyń árbir jeksenbisi dep belgilengen.
Qaraǵandylyq jartylaı marafonnyń trassasy AIMS (Halyqaralyq jartylaı marafondar men júgirýler qaýymdastyǵy) sertıfıkatyna ıe. Ol degenimiz, atalmysh jarys álemdik sporttyq sharalar kúntizbesine engizilip, onyń nátıjelerin IAAF Halyqaralyq jeńil atletıka federatsııalarynyń qaýymdastyǵy moıyndap, kásibı sportshylar reıtıngine yqpal ete alady degendi bildiredi.
