Qaraǵandyda «Araı» bazary órtendi
QARAǴANDY. QazAqparat – Qaraǵandyda tún jarymynda «Araı» bazary órtendi, dep habarlaıdy QazAqparat tilshisi.
Tótenshe jaǵdaılar mınıstrliginiń resmı ókili Talǵat Ýálıdiń habarlaýynsha, 21 qazanda saǵat 00:07-de Qaraǵandy qalasyndaǵy «Araı» bazaryndaǵy órt týraly habar túsken.
«Órt sóndirýshilerdiń oqıǵa ornyna barý ýaqyty 6 mınýtty qurdy. Kelgen sátte bazar aýmaǵynda konteınerler ashyq jalynmen janyp jatqany anyqtaldy. Nysannyń elektr toǵynan ajyratylmaǵany, sondaı-aq jaqyn turǵan basqa konteınerlerge ottyń aýysý qaýpiniń bolýymen órtti sóndirý qıyndaı túsken. Órt sóndirýshiler japsarlas ornalasqan konteınerlerdi ashyp, olardan materıaldyq qundylyqtardy qutqaryp qaldy», - dep habarlady Talǵat Ýálı.
Órtti sóndirýge Qaraǵandy oblysy TJD-niń 50 adamy men 11 tehnıkasy jumyldyryldy. Qabyldanǵan sharalardyń arqasynda órt 01:23-te sóndirildi. Órt 14 saýda konteınerinde 200 sharshy metrlik aýmaqty alǵan.
Janyp jatqan konteınerlerdiń birinde órt sóndirýshiler úlken somadaǵy aqshany taýyp, ony ıesine qaıtardy. Zardap shekkender joq. Órttiń sebebi anyqtalýda.
