Qaraǵandyda anasy tastap ketken sábı Balalar úıine berildi
QARAǴANDY. QazAqparat - Anasy aýrýhanada tastap ketken sábı mamandandyrylǵan balalar úıine berildi. Áıeldiń ózi osyny suraǵan, dep habarlaıdy QazAqparat tilshisi.
«22 mamyrda balanyń anasy ótinish jazyp, bir jastaǵy sábıin «Shapaǵat» balalar úıine tapsyrýdy surady. Áıel qazir otbasylyq jaǵdaıy tym nashar ekenin, lajsyzdyqtan osylaı istep jatqanyn aıtty. Osy mekemege ótkizýge balanyń jasy jetedi. 23 mamyrda ony balalar úıine ótkizdik. Balany bul jerde eń arysy jarty jyl ǵana qaldyrýǵa bolady, al áıel úsh aıǵa dep ótinish jazdy. Ol óz balasynan bas tartyp jatqan joq, jaǵdaıy ońalǵan boıda qaıtaryp almaqshy. Eger ala almasa da, merzimin uzartýyna bolady. Eger qazirgi merzim aıaqtalǵanǵa sheıin anasynan habar bolmasa, balalar úıimen birlese otyryp, ata-ana quqyǵynan aıyrý týraly aryz beremiz», - deıdi Abaı aýdany qorǵanshylyq jáne qamqorshylyq sektorynyń meńgerýshisi Janna Shonaeva.
Eske sala keteıik, Qaraǵandyda aýyr naýqasqa shaldyqqan áıel balasyn aýrýhanada qaldyrǵan bolatyn. Úsh apta boıy ana balasynan habar alǵan joq. Áıel muny qazirgi jaǵdaıy nashar, sábıden tys taǵy bes balanyń qamyn oılap jatqanymen túsindirdi. Onyń ekeýi áli kishkentaı. Úlken balalary mektepke ketkende olarǵa qaraıtyn eshkim joq. Kúıeýi Abaı qalasynda turady. Áıeldiń eri otbasyn jalǵyz ózi asyrap otyr. Densaýlyq saqtaý basqarmasyndaǵylardyń aıtýynsha, balanyń endigi taǵdyryn qorǵanshylyq jáne qamqorshylyq organdary sheshedi.
Illıýstratsııalyq foto
