Qaraǵandyda «Amanat» qoǵamdyq tańdaý syılyǵyna ıe bolǵan jeńimpazdar marapattaldy
ASTANA. QazAqparat - Qaraǵandy oblysynyń 8 turǵyny «Amanat» qoǵamdyq tańdaý syılyǵynyń laýreaty atandy. Olar 26 úmitker ishinen tańdaldy.
Aımaqtyq baıqaýǵa barlyǵy 100 ótinish kelip túsken, dep habarlaıdy óńir ákimdiginiń resmı saıty .
«Amanat» syılyǵy elimizdiń áleýmettik-ekonomıkalyq, qoǵamdyq ómirine ólsheýsiz úles qosqan, adamı qundylyqtardyń nyǵaıýyna septigin tıgizip júrgen, eńbegimen, adamgershiligimen kózge túsken adamdar marapattalady. Bul joba týraly kóktemde «G-Global. ÁlemHHІ ǵasyr» forýmynda jarııalanǵan bolatyn.
Aımaqtyń irikteý kezeńi Qazaqstannyń barlyq oblystarynda ótedi. Alǵash ret syılyq Qaraǵandyda tabystaldy. Úmitkerlerdi qoǵam ókilderi usyndy. Ádilqazylar quramyna belgili qaraǵandylyqtar, qoǵam qaıratkerleri, saıası partııa ókilderi, kásipkerler men kásipodaq uıym ókilderi endi. 
Temirtaý qalasynyń Qurmetti azamaty, metallýrgııa salasynyń ardageri Qýanysh Omashev; Sýretshi, Atom» jobasynyń qurmetti elshisi Káripbek Kúıikov; Qaraǵandy jáne Qarqaraly aýdanynyń Qurmetti azamaty Rymbala Omarbekova; Oblystyq máslıhat hatshysy, Aqtoǵaı aýdanynyń Shashýbaı kentindegi Mektep-balabaqsha kesheni bazasyndaǵy «Tirek mektebi (resýrstyq ortalyq) dırektory Aıman Túkbaeva; «Shyǵys» sharýa qojalyǵynyń basshysy, oblystyq máslıhat depýtaty, metsenat Shamıl Osın; Qazaqstan halqy Assambleıasynyń múshesi, "Evreı mádenıetiniń Qaraǵandy ortalyǵy" QB jetekshisi Vılen Molotov-Lýchanskıı; Parlament Májilisiniń depýtaty, bokstan álemniń eki dúrkin chempıony, olımpıada chempıony Serik Sápıev; Qazaqstannyń eńbek sińirgen qaıratkeri, teatr jáne kıno akteri Qaırat Kemalov «Amanat» qoǵamdyq tańdaý syılyǵynyń laýrettary atandy. 
Respýblıka boıynsha 112 laýreat marapattalatyn bolady. Aqtyq synda ár aımaqtan bir jeńimpaz tańdalady.
Aıta ketken jón, respýblıkalyq «Amanat» syılyǵyn tabystaý aldaǵy jyly Astanada ótedi.
