Qaraǵandyda alıment tóleýden jaltarǵan boryshker bes táýlikke tutqyndaldy
QARAǴANDY. QazAqparat - Qaraǵandyda 600 myń teńge alımenttik qaryzy bar er adam 5 táýlikke ákimshilik tutqynǵa alyndy, dep habarlady oblystyq Sot aktilerin oryndaý departamentiniń baspasóz hatshysy Ásel Ahmalısheva.
«Qazaqstanda alıment tóleýden jaltarǵan boryshkerlerge qatysty jaza kúsheıtildi. Sonyń biri tutqynǵa alyndy. 600 myń teńge somasynda bereshegi bar qatygez ákege alǵashqy qaýly shyǵaryldy, ol ákimshilik sottyń sheshimimen arnaıy qabyldaǵyshta 5 táýlik tutqynda bolady», - dedi A.Ahmalısheva.
Sot oryndaýshylary alıment boıynsha boryshkerlerge qatysty jumysty jandandyrdy, dep atap ótti vedomstvonyń baspasóz hatshysy. Onyń aıtýynsha, qazirgi ýaqytta ákimshilik sotqa materıaldar daıyndalyp jatyr.
«QR QK 136-babyna sáıkes ákimshilik jaýapkershilikke tartylǵan boryshkerdi eki jylǵa deıin bas bostandyǵynan aıyrýǵa bolady. Budan basqa, boryshkerler ákimshilik jumysqa da tartylýy múmkin», - dedi A.Ahmalısheva.
Zańda jumyssyz azamattardyń alımenttik somasyna ózgerister engizildi. «Buryn jumyssyzdar eń az aılyq tólem boıynsha, bir balaǵa 4 650 teńge tólegen. Endi Qazaqstan boıynsha ortasha jalaqy negizge alynady. Qazirgi ýaqytta bir balaǵa tólem 27 160 teńgeni, eki balaǵa - 36 213 teńgeni, úsh jáne odan kóp balaǵa - 54 320 teńgeni quraıdy», - dep túsinik berdi oblystyq Sot aktilerin oryndaý departamentiniń ókili.
