Qaraǵandyda Álıhan Bókeıhanov atyndaǵy aýdan paıda bolady
QARAǴANDY. QazAqparat - Qaraǵandynyń Oktıabrskıı aýdany Álıhan Bókeıhanovtyń esimimen atalatyn boldy, dep habarlandy oblystyq ákimdiktiń baspasóz qyzmetinen.
«Jýyrda Qaraǵandy oblysy Álıhan Bókeıhanovtyń 150 jyldyǵyn atap ótti. Onyń týǵan jeri, Aqtoǵaı aýdanynda Alash Orda lıderiniń eskertkish músini ashyldy. Óńir basshysy Nurmuhambet Ábdibekov «Alash alańy» alańyndaǵy monýmentke gúl shoqtaryn qoıyp, ǵylymı-tájirıbelik konferentsııaǵa qatysty», - delingen habarlamada.
Saltanatty sharada ákim jaqyn arada Qaraǵandyda Bókeıhanovqa arnalǵan eskertkish ashylatynyn málimdedi.
«Oblys ortalyǵynyń Oktıabrskıı aýdanyna Alash Orda lıderiniń esimi beriled» dedi ákim.
«Álıhan Bókeıhan qoǵam jáne memlekettik qaıratkeri. Sonymen qatar ol HH ǵasyrdyń zııatkeri, daryndy ǵalym men pýblıtsıst bolǵan. Ol sanaly ǵumyryn qazaq halqynyń erkindigi úshin kúreske arnady. Búgingi shara - bul ataýly kúndi toılaýdyń bastamasy ǵana»,- dep atap ótti Ábdibekov.
Álıhan Bókeıhanovtyń gıpsten jasalǵan músini Aqtoǵaı aýylyndaǵy onyń esimimen atalatyn orta mekteptiń aýmaǵynda ornalasqan. Ony Sýretshiler odaǵynyń Qaraǵandy bólimshesiniń sheberhanasynda daıyndady. Avtory - Vıktor Arent. Músinniń bıiktigi 3 metr.
1998 jyly Aqtoǵaıda «Úsh arys» Álıhan Bókeıhanov, Jaqyp Aqbaev jáne Álimhan Ermekovke eskertkish ornatyldy. 2013 jyly monýment mańynda «Alash alańy» alańy abattandyryldy.
