Qaraǵandyda Alǵys kúnine oraı etnomádenı birlestikterdiń ókilderi bas qosty
Kezdesýge balalar úıiniń, ınternat tárbıelenýshileri, áleýmettik qorǵalmaǵan otbasylardyń balalary, eriktiler men etnomádenı birlestikterdiń ókilderi shaqyryldy,
«Alǵys kúnine oraı biz «Saryarqa – dostyqtyń mekeni» atty kezdesý ótkizýdi sheshtik. Bul kúnniń túp negizi bizdiń tarıhymyzda jatyr. 30-50 jyldardyń tarıhyn eske túsirsek, bul asharshylyq, qýǵyn-súrgin jyldary. Osy jyldar ishinde Qazaqstanǵa kóptegen ult ókilderi jer aýdaryldy. Qazaqtardyń ózderinde qıyn jaǵdaı bolǵanyna qaramastan, olar qýdalaýǵa ushyrap, osy jerge aýyp kelgenderdiń barlyǵyn jyly qabyldady. Sondyqtan Alǵys aıtý kúniniń ıdeıasy – tarıhqa súıene otyryp, búgingi jas urpaqty tárbıeleý, olardyń tózimdiligine, bir-birin qurmetteýge, Qazaqstanda turatyn halyqty qurmetteýge úıretý», - deıdi ekskýrsııalyq-buqaralyq bóliminiń meńgerýshisi Záýresh Ótebaeva.
Murajaıda atap ótkendeı, «Óz tarıhyn este saqta jáne maqtan et!» - bul Alǵys aıtý kúniniń negizgi oıynyń biri.
«Munda jastar kóp jınaldy. Alǵys aıtý kúni – qazaq halqyna, qazaq jerine úlken alǵys aıtý kúni. Bul mereke nege bekitildi? Jastarǵa tarıh týraly aıtyp, bir-birin qurmetteýge úıretý úshin. Aǵa býyn qandaı qıyndyqty bastan keshirgenin bilýi tıis. Jas urpaqqa muny túsiný qıyn. Barlyq qıyndyqqa qaramastan olar adamdyq qadir-qasıetin saqtaı aldy, bir-birine meıirimdi boldy. Qazaq halqy óziniń meıirimdiligin, qonaqjaılylyǵyn jáne danalyǵyn kórsetti. Biz, osyndaı halyqtyń bar ekenine, osyndaı jer bar ekendigine, bizdiń ortaq úıimiz Qazaqstanǵa alǵysymyz zor», - dedi Belarýs mádenı ortalyǵynyń ókili Nına Mısochenko.
Sonymen qatar kezdesý aıasynda murajaı qorynan kórme uıymdastyryldy. Onda ulttyq kıim, túrli halyqtardyń turmys zattary qoıylǵan. Sondaı-aq, Qaraǵandy ulttyq-mádenı ortalyqtary dástúrlerin, ulttyq kıimder men ulttyq taǵamdar kórsetti.
Qazaqstanda Alǵys aıtý kúni 2016 jyly Qazaqstannyń Tuńǵysh Prezıdenti – Elbasy N. Nazarbaevtyń bastamasymen bekitildi.
