Qaraǵandyda alǵashqy qazaqstandyq mystyń balqytylýynyń 90 jyldyǵy atalyp ótti

Bul oqıǵa alǵash ret 1928-shi jyldyń 19-shy qazanynda bolǵan edi, dep habarlaıdy QazAqparat tilshisi óńir ákimdiginiń baspasóz qyzmetine silteme jasap.

Metallýrgterdi Qaraǵandy oblysynyń ákimi quttyqtady. Óziniń quttyqtaý sózinde Erlan Qoshanov Qarsaqpaı zaýytynyń mańyzdylyǵyn atap ótti.

«Osydan 90 jyl buryn Qarsaqpaıda ataýly oqıǵa - Qazaqstandaǵy birinshi mys balqytyldy. Tarıh úshin qas-qaǵym ǵana sát, degenmen osy ýaqyt aralyǵynda kóptegen oqıǵalar boldy. Qanysh Sátpaevtyń ǵylymı qyzmeti de osy jerden bastaý alǵan, munda bizdiń elimizdiń alǵashqy metallýrgteri eńbek etken. Sondyqtan tek aımaǵymyz úshin ǵana emes, jalpy elimiz úshin zaýyt jumysyn jalǵastyrǵany mańyzdy, sebebi ol tarıh, bizdiń metallýrgııamyzdyń bastaýy», - dedi oblys basshysy.

Qarsaqpaıdaǵy mys balqytý zaýyty Qazaqstandaǵy birinshi nysan boldy. Munda hımııalyq quramy erekshe bolyp keletin jezqazǵandyq mys rýdasyn óńdeýdiń jańa tehnologııalary ıgerilgen. Sońyra ol tehnologııa Oraldaǵy jáne Balqashtaǵy zaýyttardy jobalaý kezinde paıdalanylǵan.

Qarsaqpaı tek sapaly myspen ǵana emes, sonymen qatar bilikti mamandary, qyzmetkerlerimen de óte tanymal bolǵan. Munda ózderiniń eńbek jolyn tek Qazaqstannyń ǵana emes, búkil Keńes Odaǵynyń ataqty metallýrgteri bastaǵan.

«1954-shi jyly meni jas maman retinde Qarsaqpaı mys balqytý zaýytyna baǵyttady. Men munda 50 jyl jumys istedim. Men osynda endi ǵana jumys isteı bastaǵanda zaýyttyń ónimdiligi jylyna bes myń tonnany quraǵan bolatyn. Al men zeınetkerlikke keterde ol kórsetkishter birneshe ese ósken. Biz osyndaı tarıhı kásiporyndy damytýǵa úlesimizdi qosqanymyzdy maqtan tutamyz», - dedi ardager-metallýrg Nyǵmet Іlııasov.

Búgingi tańda zaýyttyń negizgi qyzmet túri «Kazakhmys Holding» JShS kásiporyndary úshin shoıyn zattardy daıyndaý bolyp tabylady. Zaýyt kompanııanyń kenishteri, fabrıkalar men zaýyttary paıdalanatyn qurylǵylardyń qosalqy bólshekteri sekildi shamamen 80-ge jýyq ónimderdi jasap shyǵarady.

Aımaq basshysy jáne mereke qonaqtary qaıta qalypqa keltirilgen Qanysh Sátpaevtyń murajaı úıinde bolyp qaıtty. Bul úıde ǵalym tek otbasymen turyp qana qoımaı, Qazaqstandaǵy alǵashqy geologııalyq-barlaý kontorasyn ashqan. Ol jaıly estelik taqtada aıtylǵan. Bul ǵımarat 1969-shy jyldan bastap kelýshiler úshin esigin aıqara ashty. Qazirgi kúni murajaı-úıde 3 myńǵa jýyq jádigerler bar.

Saltanatty shara barysynda úzdik metallýrgter men ardagerlerge Qaraǵandy oblysy ákiminiń alǵys hattary tabys etildi. «Qazaqmys» korporatsııasy olarǵa avtokólikterdiń kiltin syılady. Merekelik toı-dýman sporttyq saıystarǵa jáne kontserttik baǵdarlamaǵa ulasty.