Qaraǵandyda alǵashqy elektrobýsty testileý aıaqtaldy
ASTANA. QazAqparat - Byltyr kúzde Qaraǵandyda alǵashqy elektrobýs qatynaı bastaǵan edi. Qala bıligi atalmysh kólik túri qoldanystaǵy avtobýstardy qanshalyqty almastyra alatynyn bilý úshin jolǵa shyǵarǵan bolatyn. Osy ýaqytqa deıin elektrobýs №66 baǵyttaǵy jolaýshylardy tasymaldady. «Qaraǵandy jolaýshylar kóligi jáne avtomobıl joldary bólimi» MM-de ótkizilgen synaqtyń nátıjesi týraly aıtyp berdi, dep habarlaıdy QazAqparat ekaraganda saıtyna silteme jasap.
Elektrobýstardy Qazaqstan-Qytaı kásiporny shyǵaryp jatyr. Olar elimizde qurastyrylýda. Kóliktiń bul túri Qazaqstan klımatynyń erekshelikterine beıimdelgen. Elektrobýstarǵa 20 myń jumys aınalymyna jetetin ınnovatsııalyq batareıalar ornatylǵan. Aldyn ala esep boıynsha, bir batareıa 1 mln shaqyrymnan astam qashyqtyqqa jetedi, ıaǵnı 10 jylǵa deıin jaramdy. Elektrobýstardyń quny qarapaıym avtobýstardan 15-20% qymbat, ıaǵnı 280 myń dollardy quraıdy.
Qala ákimdiginen habarlaǵandaı, júrgizilgen synaq boıynsha elektrobýs ózinde kórsetilgen tehnıkalyq sıpattamalardy tolyǵymen dáleldedi jáne óńirdegi qalalyq marshrýttarda qoldaný úshin jaramdy bolyp tanyldy.
«Elektrobýsty júrgizgen №2 avtopark tarapynan jáne turǵyndardan syn-eskertýler túsken joq», - dep jaýap berdi ákimdikte.
