Qaraǵandyda alǵash ret ústel tennısinen reıtıngtik Halyqaralyq týrnır ótedi
QARAǴANDY. QazAqparat – Qazaqstan alǵash ret ústel tennısinen 2021 ITTF Kazakhstan International Open Halyqaralyq týrnırin ótkizedi. Jarys 15-19 qyrkúıek aralyǵynda Qaraǵandy ústel tennısi ortalyǵynda ótedi, dep habarlaıdy QazAqparat tilshisi.
Sharaǵa Avstrııa, Saýd Arabııasy, Úndistan, Belarýs, Reseı, Ózbekstan, Qyrǵyzstan, Mońǵolııa jáne Qazaqstannan 70-ten astam sportshy qatysady. Týrnır kórermendersiz ótedi. Dodany Qazsport telearnasy ITTF halyqaralyq federatsııasynyń resmı saıty tikeleı efırde kórsetedi.
«Bul bizdiń elimizdegi ústel tennısi boıynsha ótkizgeli otyrǵan alǵashqy halyqaralyq shara emes. 2017 jyly Nur-Sultanda álemniń eń myqty sportshylarynyń qatysýymen ITTF World Tour Grand Finals halyqaralyq týrnıri ótti. Bıylǵy jyly QR Ústel tennısi federatsııasynyń Halyqaralyq federatsııa qamqorlyǵymen bedeldi týrnırler uıymdastyrý boıynsha uzaq merzimdi josparlary bar. Biz jyl saıyn Kazakhstan Open ótkizýdi josparlap otyrmyz, onyń ústine Qaraǵandy ortalyǵy barlyq álemdik standarttarǵa saı jáne kez kelgen deńgeıdegi jarystardy ótkizýge qabiletti», – deıdi QR Ústel tennısi federatsııasynyń prezıdenti Danııar Ábilǵazın.
Aýdany 4 myń sharshy metrden asatyn Saryarka ortalyǵynda 18 tennıs ústeli bar oıyn zaly jáne 9 tennıs ústeli ornatylǵan jattyǵý zaly bar. Keshendi daıyndyq úshin jattyǵý zaldary, medıtsınalyq kabınet, sportshylarǵa arnalǵan demalys bólmeleri, tóreshiler men bapkerler bólmeleri, konferents-zaldar men fýd-kort jabdyqtalǵan.
Júlde qory 30 myń USD bolatyn bedeldi jarys TMD elderi aýmaǵyndaǵy ITTF halyqaralyq ústel tennısi federatsııasynyń bıylǵy jylǵy jalǵyz reıtıngtik týrnıri bolyp tabylady.
Qazaqstan quramasy sapynda eki Olımpıada oıyndarynyń qatysýshysy jáne qurama kóshbasshysy Kırıll Gerasımenko óner kórsetedi.
