Qaraǵandyda áleýmettik jelide túıneme týraly jalǵan aqparat taratqandarǵa qatysty qylmystyq is qozǵady

Bul týraly oblystyń ІІD bastyǵynyń orynbasary Qaırat Dúısebekov málimdedi.

 «WhatsApp kross-platformalyq qosymsha arqyly 17 adam túıneme juqtyrdy, osyǵan baılanysty TJ jarııalanýy múmkin degen aqparat taratý faktisi boıynsha QR QK 274-baby boıynsha qylmystyq is qozǵady», - dedi brıfıngte Q. Dúısebekov.

Sotaldy tergeý júrgizilýde. «Bul aýyr qylmysqa jatady. Bap sanktsııasy 10 jylǵa deıin bas bostandyǵynan aıyrýdy kózdeıdi. WhatsApp arqyly aqparat taratý kózin aıqyndaýǵa bolady, bizde buǵan múmkindikter bar», - dep atap ótti ІІD bastyǵynyń orynbasary.

Budan basqa, sút ónimderi sibir jarasymen zaqymdanǵan, qaskúnemderdi tabýǵa 1 mln teńge syıaqy taǵaıyndaldy degen aqparat tarady. Kompanııa jalǵan aqparat taratqandarǵa qylmystyq is qozǵaý týraly polıtsııaǵa shaǵymdandy. «Halyq osylaı dúrlikpe áreketimen qoǵamǵa qaýip tóndiretinderin bilmeıdi», - dep atap ótti kompanııadan.

Oblystyń DSB basshysynyń orynbasary Fazyl Kópebaev oblystyq ınfektsııalyq aýrýhanaǵa túıneme naýqasymen baılanysta bolǵan bir adamnyń jatqyzylǵanyn aıtty. «QMÝ besinshi kýrs stýdenti oblystyq klınıkalyq aýrýhanada kezekshilikte  dárigerlermen birge keıinnen qaza tapqan áıeldi qaraǵan. Baılanystan keıin ol aldyn alý maqsatynda antıbıotıkoterapııa kýrsyn aldy. Ol aýrýhanaǵa júgindi», - dep túsindirdi dáriger.

Orynbasardyń aıtýynsha, stýdenttiń  jaǵdaıy qanaǵattanarlyq.  «Barlyq zerthanalyq zertteý alyndy, endi nátıjesin kútýdemiz» , dep qosty ol.

Medıkterdiń aqparatynsha, aýrýhanaǵa Shet aýdany Erkindik aýylynan 9 jasar balasymen taǵy bir áıel jetkizilgen. Teksergennen keıin aýrý belgileri tabylmady, olar úılerine qaıtaryldy.
Osylaısha baılanysta bolǵan adamdar sany - 73.

Eske salsaq, Erkindik aýylynda túıneme saldarynan 15 kúnge  TJ rejimi engizilgen.  Aýyl turǵyny aýrý mal soıyp, týystaryna, kórshilerine taratqan. 9 adam aýrýhanaǵa túsip, ekeýi qaza tapty.

Fakti boıynsha QR QK 327-baby, QR QK 317-babymen eki qylmystyq is qozǵaldy. Sot aldy tergeý júrgizilýde.

Budan basqa eki vedomstvolyq komıssııa jumys isteýde. Biri veterınarııalyq dárigerlerdiń, ekinshisi dárigerlerdiń jumys sapasyn tekserýde.