Qaraǵandyda áleýmettik dárihanalar jelisi keńeıtilmek
ASTANA. QazAqparat - Qaraǵandy oblysynyń apparattyq jınalysynda naýqastardy tegin dárimen qamtamasyz etý jaǵdaıy qaraldy, dep habarlaıdy QazAqparat ákimniń saıtyna silteme jasap.
Ol týrally jınalysta Densaýlyq saqtaý basqarmasynyń basshysy Erjan Nurlybaev aıtyp berdi.
Onyń aıtýynsha 2018 jylǵa dári-dármekterdi satyp alýdy qarjylandyrý máselesi sheshilgen. Osy maqsatta Densaýlyq saqtaý mınıstrligi rekordtyq soma 9 mlrd teńge bóletin boldy. Aıta keteıik, 2017 jyly dármekterdi alýǵa 3,5 mlrd teńge bólingen bolatyn.
Tegin dári-dármekter qant dıabeti, Kron derti, AITV, týberkýlez jáne t.b. aýrýlarǵa shaldyqqan adamdarǵa tıesili.
«Dárilerdi satyp alýda shartty ekonomııanyń arqasynda biz 383 mıllıon teńge únemdedik. Biz ol aqsha qosymsha satyp alýǵa oblysqa qaıtarylýy úshin qosymsha kelisimge qol qoıdyq. Ol medıkamentterdiń alǵashqy partııasy qazannyń birinshi onkúndiginde túsýi tıis. Sonymen qatar medıtsınalyq nemese áleýmettik kórsetkishterge baılanysty tósten shyǵarylǵan nárestelerge arnalǵan balalar taǵamynyń qajetti kólemi de satyp alynǵan. Halyqty dári-dármekermen turaqty qamtý úshin qarjylandyrý osy jyldyń qarasha aıynda bastalady, - dedi Erjan Nurlybaev.
Oblysta áleýmettik dárihanalardyń jelisin keńeıtý kózdelýde. Qazirgi tańda aımaǵymyzda olardyń sany 35-ke jetken, jyl sońyna deıin Qaraǵandy, Jezqazǵanda jáne aýyldyq jerlerde 7 osyndaı dárihana ashylady dep ýáde berildi. Al áleýmettik dárihanalar bolsa óz kezeginde dármekterdiń assortımentin keńeıtýdi josparlap otyr. Ol jerde kommertsııalyq núktelerge qaraǵanda dárilerdi arzanyraq satyp alýǵa bolady. Sebebi qosymsha qun 5%-dan aspaıdy.
