Qaraǵandyda alaıaqtyq úshin segiz rıeltor sottalyp jatyr
QARAǴANDY. QazAqparat - Qaraǵandyda Ońtústik Qazaqstan, Shyǵys Qazaqstan oblystarynyń, Qaraǵandy, Astana jáne taǵy da basqa qalalardyń 180 turǵynynan alaıaqtyqpen aqsha jymqyrǵan er adam jáne jeti áıeldiń soty ótip jatyr, dep habarlaıdy «QazAqparat» HAA tilshisi.
Aldanǵandardyń kópshiligi Qaraǵandy qalasyna issaparmen kelgender, taǵy birazy otbasylyq jaǵdaılaryna baılanysty jalǵa beriletin páter izdeýge májbúr bolǵandar.
Qaraǵandy ІІB Ortalyq polıtsııa bólimi tergeýshisiniń nusqasyna qaraǵanda, segiz sottalýshy klıentterinen 8 myń teńgeden aqsha alyp, baspana berýge daıyn páter ıeleriniń nómirleri jazylǵan tizimdi usynyp otyrǵan. Olar úsh agenttik qurǵan: «Pozıtıv», «Shyǵys» jáne «Kvartırnyı vopros».
«Sot aldynda otyrǵan Zarına Balken «Nókerbekov» jeke kásipkerliginiń keńsesinde maǵan spektakl qoıyp berdi. Úsh adamǵa telefon soǵyp, páterlerin jalǵa berip jibergen be, joq pa, sony surady. Onan soń telefondy qoıyp, úsh bos páter bar ekenin aıtty. Biraq aldymen 8 myń teńge talap etip, jolym bolmasa aqshany qaıtarýdy talap etpeıtindigim týraly kelisimshartqa qol qoıýymdy surady. Men oǵan qol qoıdym. Kúni boıy álgi úsh nómirge telefon soqtym, olar sóndirýli boldy», - deıdi jábirlenýshi Baıan.
Jarty jyl ishinde joǵaryda atalǵan úsh agenttiktiń ókilderin qylmystyq jaýapqa tartýdy surap, 180-ge jýyq azamat polıtsııaǵa júgindi.
Tergeý nusqasyna oraı, sottalýshylar materıaldyq zalaldyń somasy nebári segiz-aq myń teńge, al mundaı usaq aqshaǵa bola quqyq qorǵaý organdary qylmystyq is qozǵamaıdy dep oılaǵan.
Onyń ústine, ákki rıeltorlar klıentterdiń ózderine qol qoıǵyzyp alǵan kelisimshartty jazaǵa tartylmaýdyń kepili retinde paıdalanǵan.
Agenttik dırektory Marat Nókerbekov Qylmystyq kodekstiń 190-babynyń 3-bóligine («adamdar tobynyń aldyn ala sóz baılasýymen, óz qyzmetin paıdalana otyryp, birneshe ret jasalǵan alaıaqtyq») sáıkes aıyptalyp otyr. Sebebi joǵaryda atalǵan úsh agenttik «Nókerbekov» JK-ǵa tirkelgen. Jeti áıelge Qylmystyq kodekstiń 190-baby, 2-bóligi («adamdar tobynyń aldyn ala sóz baılasýymen birneshe ret jasalǵan alaıaqtyq») boıynsha aıyp taǵyldy. Olar bostandyqta júr. Áıelderge qatysty «kepildikke bosatý» bultartpaý sharasy qoldanylǵan.
Eske sala keteıik, «Pozıtıv», «Shyǵys» jáne «Kvartırnyı vopros» jyljymaıtyn múlik agenttikteriniń dırektory 2017 jylǵy tamyzda jalǵa beriletin baspanaǵa qatysty alaıaqtyq isine kúdikti retinde ustalǵan bolatyn .
