Qaraǵandyda aqyn Ǵalym Jaılybaıdyń shyǵarmashylyq keshi ótti
ASTANA. QazAqparat - Kenshiler mádenıet saraıynda aqyn Ǵalym Jaılybaıdyń 60 jyldyq mereıtoıyna arnalǵan «Aqqýlardyń jyr jazdym qanatyna» atty shyǵarmashylyq keshi ótti. Mereıtoı ıesiniń qurmetine qalada naǵyz poezııa merekesi uıymdastyryldy. Saltanat ıesin quttyqtaýǵa tek ataqty qazaqstandyqtar ǵana emes, sonymen qatar shet eldik qonaqtar da keldi. Mereke Qasym Amanjolovtyń monýmentine gúl shoqtaryn qoıýdan bastaldy, dep habarlaıdy oblystyq ákimdiktiń baspasóz qyzmeti.
Sonymen qatar bul kúni «Saryjaılaý» kınoteatrynda aqynnyń shyǵarmashylyq portreti ótti. K.S. Stanıslavskıı atyndaǵy orys drama teatrynda S. Qojamqulov atyndaǵy jezqazǵan mýzykalyq-drama teatrynyń ujymy Ǵalym Jaılybaıdyń poemasy boıynsha «Qara oramal» spektaklin qoıdy.
Shyǵarmashylyq keshke Qaraǵandy oblysynyń ákimi Erlan Qoshanov qatysty. Aımaq basshysy mereıtoı ıesine Qazaqstan premer-mınıstri baqytjan Saǵyntaevtyń atynan alǵys hatyn tabys etti.
- Biz óz aqyndarymyzdy árdaıym qurmettep keldik jáne qurmetteımiz. Poezııa - ol júrekten shyqqan sózder, halyqtyń rýhyn kóteretin, eldiń qýatyn artatyn, barlyǵyn biriktiretin kúsh. Tarıh betterinde kim qalady? Tarıhta dáýletti jáne bedeldi tulǵalar emes, sizder sekildi aqyndar qalady. Siz shynshyl, shynaıy aqynsyz, óz elińizdiń patrıotysyz. Siz mahabbat týraly kóp jazasyz, basqa qazirgi zamanǵy aqyndardyń óleńderin basqalardan kóbirek ózge tilderge aýdarasyz. Denińiz saý bolsyn, shyǵarmashylyǵyńyz órleı bersin, - dedi oblys ákimi Erlan Qoshanov.
Aqynnyń shyǵarmashylyq keshinde tanymal qazaqstandyq aqyndar Ǵalym Jaılybaıǵa arnaǵan óleń shýmaqtaryn oqydy. Ózderiniń óleń shyǵarý sheberligin jas aqyndar da kórsete aldy. Óz týyndylaryn oqı otyra olar tájirıbeli áriptesterinen keńester aldy.
Ǵalym Jaılybaı - «Qurmet» ordeniniń ıegeri jáne «Alash» halyqaralyq syılyǵynyń laýreaty, Qazaqstan Respýblıkasynyń eńbek sińirgen qaıratkeri, Reseı Jazýshylar Odaǵynyń S.Esenın atyndaǵy altyn medal ıegeri. Ol 1958-shi jyly 9-shy aqpanda Qaraǵandy oblysy jańaarqa aýdanynyń Jeńis kentinde dúınege kelgen.
Búgingi tańda aqynnyń 20-ǵa jýyq ánderi jáne úsh tomdyq týyndylary bar. Olardyń jartysynan kóbisi 14 tilge aýdarylǵan.
