Qaraǵandyda «Aqyldy qala» jobalarynyń baıqaýy jarııalandy
ASTANA. QazAqparat - Qaraǵandyda «Saryarqa bolashaǵy» baıqaýyna ótinimder qabyldaý jarııalandy. Bıyl baıqaýdyń taqyryby «Aqyldy qala» bolady, dep habarlaıdy óńir basshysynyń resmı saıty.
Qazylar alqasy qala qurylysy, qoǵamdyq qaýipsizdik, densaýlyq saqtaý jáne bilim berý salalaryndaǵy úzdik jobalardy tańdaıdy.
Jeńimpazdar syılyq retinde 200-den 500 myń teńge deıingi kólemde aqshalaı syıaqy alady.
Baıqaýdyń uıymdastyrýshysy - «Saryarqa ÁKK» AQ.
Baıqaý jumystary úsh sanatqa bólinedi: «Mektep oqýshylary jáne JOO men kolledjderdiń 1-2 kýrs stýdentteri arasyndaǵy úzdik gýmanıtarlyq-tehnıkalyq ınnovatsııalyq joba», «Mektep oqýshylary men kolledjderdiń 1-2 kýrs stýdentteri arasyndaǵy úzdik tehnıkalyq ınnovatsııalyq joba» jáne «JOO men kolledjderdiń 3-4 kýrs stýdentteri men 29 jasqa deıingi jas ǵalymdar arasyndaǵy úzdik ınnovatsııalyq joba».
Birinshi sanat boıynsha óz jumystaryn usynatyn qatysýshylardan qazylar alqasy áleýmettik mańyzǵa ıe jáne qala turǵyndarynyń ómirin jaqsartýǵa baǵyttalǵan batyl ári erekshe jobalardy kútedi. Olardy tehnıkalyq turǵyda rastaýdyń, qunyn eseptep, júzege asyrý joldaryn izdeýdiń qajeti joq.
Ekinshi sanatta qatysýshylarǵa jobanyń tehnıkalyq jaǵyn negizdeý kerek. Ony júzege asyrý qazir nemese jaqyn bolashaqta múmkin dep boljanyp otyr.
Úshinshi sanat - eń kúrdeli. Onda tolyǵymen daıyn jáne túbegeıli oılastyrylǵan, quny, qýattylyǵy eseptelgen jobalar qarastyrylady.
Ár sanat boıynsha jeńimpazdar 500 myń teńge kóleminde syıaqy alady.
Ekinshi oryn alǵan baıqaýǵa qatysýshylar 300 myń teńgeden, al úshinshi oryn ıelengender 200 myń teńge kóleminde syılyqqa ıe bolady.
Qatysýǵa ótinimder 4 mamyrǵa deıin qabyldanady. Qorytyndyny jarııalaý 1 maýsymǵa josparlanyp otyr.
