Qaraǵandyda aǵash monsha otqa orandy
QARAǴANDY. QazAqparat - Búgin Qaraǵandydaǵy 2 qabatty monsha kesheni órtendi, dep habarlaıdy QazAqparat TJK baspasóz qyzmetine silteme jasap.
«5 qańtar kúni órtke qarsy qyzmetine Qaraǵandy qalasy Ermekov kóshesindegi aǵashtan qıyp salynǵan 2 qabatty «Riviera» monsha kesheniniń órtenip jatqany týraly habar kelip tústi. Jalyn shamamen 130 sharshy metr aýmaqty, atap aıtqanda shatyr men syrtqy qabyrǵany sharpyǵan. Órt sóndirýshilerdiń kúshimen 2 adam evakýatsııalandy. Órt 16:55-te aýyzdyqtalyp, 17:10-da tolyq sóndirildi» delingen habarlamada.
Qazirgi ýaqytta tótenshe oqıǵanyń sebebi anyqtalyp jatyr. Tilsiz jaýmen kúresýge jeke quramnan 45 qyzmetker men 12 arnaıy tehnıka jumyldyrylǵan. Órt kezinde eshkim zardap shekken joq.
