Qaraǵandyda adam saýdasymen aınalysty degen kúdikpen Reseı azamaty ustaldy
QARAǴANDY. QazAqparat - Qaraǵandyda Ózbekstan azamatshasyn seksýaldy quldyqqa satty degen kúdikpen Reseı Federatsııasynyń azamaty ustalyp, eki aıǵa tergeý ızolıatoryna qamaldy, dep habarlaıdy QazAqparat tilshisi.
«Tergeý organynyń, ishki ister departamenti tergeýshisiniń ótinish haty qanaǵattandyryldy. Kúdiktige qatysty eki aı merzimge «qamaýǵa alý» bultartpaý sharasy qoldanyldy», - dep habarlady Qaraǵandy qalasy №1 Qazybek bı aýdandyq sotynyń baspasóz qyzmeti.
Reseı azamaty Qylmystyq kodekstiń 128-baby «Adam saýdasy» jáne 149-baby «Turǵyn úıge qol suqpaý quqyǵyn buzý» boıynsha eki qylmysty jasaýda kúdikti bolyp otyr.
Tergeý nusqasy boıynsha, jábir kórgen qyz jumys istep, aqsha tabý maqsatynda Ózbekstannan Qazaqstanǵa kelgen, alaıda seksýaldy quldyqqa túsken. Onyń qujattaryn tartyp alyp, Almatydaǵy jaldamaly páterde ustaǵan. Tergeýshilerdiń aıtýynsha, qyzdy 28 jastaǵy Reseı azamaty kúshtep ustaǵan. Almatyda birneshe aı jezókshe bolyp jumys istegen soń, Reseı azamaty qyzdy qaraǵandylyq jeńgetaılarǵa satqan. Soma kólemi jarııalanǵan joq. Qaraǵandy oblysy ishki ister departamentiniń polıtseıleri Ózbekstan azamatshasyn bosatty.
ІІD baspasóz qyzmetiniń málimdeýinshe, uıymdasqan qylmyspen kúres basqarmasynyń qyzmetkerleri jedel aqparat kózderinen tutqyn qyz týraly estip, sheteldik qyzdy seksýaldyq quldyqtan bosatqan jáne Reseı Federatsııasy azamatyn ustaǵan.
Bultartpaý sharasyn qoldaný kezinde qyzdy satý týraly barlyq derekter jáne onyń anketalyq derekteri qupııalandyryldy.
Reseı azamatynan bólek, saýda men jeńgetaılyqqa atsalysqany úshin 37 jastaǵy qaraǵandylyq pen 30 jastaǵy shahandyq áıel kúdikti dep tanyldy. Olarǵa qatysty bultartpaý sharasy áli anyqtalǵan joq.
