Qaraǵandyda Abaıdyń 175 jyldyǵyna arnalǵan stýdentter aıtysy ótedi

QARAǴANDY. QazAqparat – Qaraǵandy memlekettik tehnıkalyq ýnıversıteti uly aqyn Abaıdyń 175 jyldyǵyna oraı stýdentter arasynda «Óleń – sózdiń patshasy» atty respýblıkalyq aıtys ótkizedi, dep habarlaıdy QazAqparat tilshisi.

Jas sýyrypsalma aqyndar arasyndaǵy jarys 28 aqpanda ótedi. Respýblıkalyq stýdentter aıtysy QarMTÝ-da jastar arasynda halyq óneri men Abaı shyǵarmashylyǵyn nasıhattaý maqsatynda uıymdastyrylady.

Qazylar alqasynyń quramyna Qaraǵandy oblysynyń aıtyskerleri men aqyndar kiredi. Qazylar alqasy músheleriniń arasynda tanymal aıtysker Dıdar Hamıev bar. Qazylar alqasynyń tóraǵasy, L. N. Gýmılev atyndaǵy Eýrazııa ulttyq ýnıversıtetiniń professory Amanjol Áltaev bolady.

Respýblıkalyq aıtysqa elimizdiń birneshe aımaǵynan kelgen JOO stýdentteri qatysady dep josparlanýda. QarMTÝ men QarMÝ-dan basqa Qazaq ulttyq óner ýnıversıtetiniń, Pavlodar memlekettik pedagogıkalyq ýnıversıtetiniń, Almaty «Qaınar» Akademııasynyń, Ońtústik Qazaqstan memlekettik ýnıversıtetiniń, Eýrazııa ulttyq ýnıversıtetiniń, Qyzylorda memlekettik ýnıversıtetiniń jáne Semeı qalasynyń memlekettik ýnıversıtetiniń stýdentteri ózara saıysqa túsedi.