Qaraǵandyda Abaı atyndaǵy balalar kitaphanasy dárister serııasyn bastady

QARAǴANDY. QazAqparat – Qaraǵandy óńirinde Abaıdyń 175 jyldyǵyna oraılastyrylǵan sharalar jalǵasýda. Oblystyq balalar kitaphanasy «Abaı jaqqan bir sáýle...» atty dárister serııasyn ótkizbek, dep habarlaıdy QazAqparat tilshisi.

Bıylǵy jyly qazaqtyń uly aqyny, oıshyl Abaıdyń týǵanyna 175 jyl tolady. Qaraǵandy oblystyq Abaı atyndaǵy balalar kitaphanasynda jyl boıy mereıtoıǵa arnalǵan ártúrli sharalar ótetin bolady.

Olardyń qatarynda ár toqsan saıyn «Abaı jaqqan bir sáýle...» taqyrybynda lektsııa uıymdastyrý josparlanǵan.

Dáriskerler – fılologııa ǵylymdarynyń doktory, E. Bóketov atyndaǵy Qaraǵandy memlekettik ýnıversıtetiniń rektory Berik Rahymov pen fılologııa ǵylymdarynyń doktory, professor, «Sotsıým. Til. Mádenıet» qoǵamdyq birlestiginiń prezıdenti Nursulý Bóketova.

Birinshi dáris 12 aqpanda ótedi. Bastalýy saǵat - 12.00. Sharaǵa qala mektepteriniń 9-11 synyp oqýshylary shaqyryldy.

Esterińizge sala keteıik, balalar kitaphanasynda Uly aqynnyń 175 jyldyǵyna arnalǵan mýltımedııalyq kórme-ınstallıatsııa ashyldy. Ol jyl sońyna deıin jumys isteıtin bolady.