Qaraǵandyda 900 myńǵa jýyq gúl otyrǵyzylady
QARAǴANDY. QazAqparat - Qaraǵandy qalasynda gúl otyrǵyzý jumystary bastaldy. Aldaǵy jazda Qaraǵandy naǵyz gúl alqabyna aınalmaq. Qalanyń ártúrli bólikterinde shyraıgúlder, barqytgúlder, tsınerarııalar jaıqalyp turatyn bolady, dep habarlaıdy QazAqparat tilshisi Qaraǵandy oblysy ákimdiginiń baspasóz qyzmetine silteme jasap.
«Ótken jyly biz alǵash ret satylaı kógaldandyrý tehnologııasyn paıdalandyq, ıaǵnı taıanyshtardy aspaly shyraıgúlder egilgen qumyralarmen bezendirdik, sándik matall aǵashtardy ornattyq», - dep bólisti Qaraǵandy saıabaqtary basqarmasynyń bas ınjeneri Talǵat Smaıylov.
Qalany kógaldandyrý tujyrymdamasyna sáıkes, qalanyń kólik kóp júretin bólikteri ózgeriske ushyramaq.
«Osy jyly da dál solaı bolmaq. Respýblıka dańǵyly men Magnıgotorskaıa kóshesiniń bólý jolaqtarynda 83 bessabaqty gúl arkalary salynady. Sondaı-aq, Maıqudyq, Prıshahtınsk jáne Ońtústik-Shyǵystaǵy taıanyshtarǵa kúl qumyralaryn qoıý josparda bar. Bıyl qosymsha 6800 qumyra satyp alyndy. Jol boıyndaǵy baǵanalardy gúl qumyralarymen sándeý de satylaı kógaldandyrýdyń jańashyldyqtarynyń biri bolmaq.
Sonymen qatar, qalanyń belgilengen jerlerinde topıarlyq músinder paıda bolady, jalpy 24 sándik músin satyp alynǵan. Aldaǵy ýaqytta kásiporynnyń taza paıdasy esebinen taǵy da qosymsha satyp alý josparlanýda.
«Biz satyp alǵan Canada green kógal shóbi mehanıkalyq áserge tótep bere alatyn jáne sýyqqa tózimdilik sııaqty paıdaly qasıeti bar tuqymdar jıyntyǵynan turady. Gúlderdi ekkennen keıin ol úsh jyl boıy paıda beretin bolady», - dedi Talǵat Smaıylov.
Erekshe gúl kompozıtsııasy Ortalyq saıabaqta jas jubaılar qulyp iletin kópirdiń janynda paıda boldy. Bul jer áldeqashan ǵashyqtar buryshy atalyp ketken. Munda bolashaqta jabaıy júzimge oranatyn úsh arka, alty oryndyq, eki aq attyń músini turǵyzylǵan. Gúlzarlar men qumyralarda gúlder otyrǵyzyldy.
